美國總統特朗普同中國國家主席習近平喺北京舉行嘅兩日峰會，今日將以工作午餐結束，特朗普隨即啟程返美。呢場被外媒形容為「地位嚴重不對等」嘅特習會，表面上禮炮齊鳴、紅地毯鋪地，仲有數百名小朋友揮舞小旗營造熱鬧氣氛，但實質上中美雙方嘅對話明顯格格不入。特朗普一路高調讚習近平係「偉大領導人」，話能成為佢朋友係一種榮幸，但習近平就保持冷靜，甚至多次警告如果台灣問題處理唔好，中美可能爆發公開衝突。

有分析指，特朗普今次訪華其實係帶住急切嘅需要。美國喺伊朗戰事上已經徹底失控，霍爾木茲海峽封鎖影響全球石油供應，中國作為最大進口國自然深受其害。特朗普喺峰會首日就透露，習近平承諾唔會向伊朗提供軍事裝備，並願意協助重新開放海峽。呢個表態對華盛頓嚟講，絕對係及時雨。加上美國中期選舉只剩幾個月，特朗普支持率跌到谷底，佢好希望中國能透過價值數十億美元嘅採購承諾，幫手挽救國內經濟同選情。特朗普仲宣布中國承諾購買200架波音飛機，又邀請習近平9月訪白宮，呢啲友好姿態明顯係想拉近距離。

但習近平嘅關注點就完全唔同。佢最關心嘅只有台灣問題。將台灣納入中華人民共和國，被視為習近平任期內嘅核心使命。中國外交部發言人強調，台灣問題係中美關係中最重要、最敏感嘅議題，習近平喺會面中直言，如果美國錯誤處理，就會導致「衝突甚至戰爭」，令整個關係陷入極大危險。係今次嘅會談中雖然雙方互致友好言辭，仲同意將中美關係定性為「具有建設性嘅戰略穩定關係」，但中方喺台灣問題上嘅強硬立場從未鬆動。台北方面已經開始擔心，特朗普會唔會為咗同北京達成交易，而犧牲台灣利益。特朗普喺呢個問題上嘅沉默，對台灣嚟講簡直震耳欲聾。

峰會第一日，特朗普表現得出奇低調，冇即時公布重大成果，主要係禮儀同緩和氣氛。雙方討論咗貿易、稀土同半導體出口限制、人工智能同知識產權等多個敏感領域。美國財政部長貝森特透露，兩國仲同意建立防範人工智能引發網絡攻擊風險嘅「安全機制」。特朗普身邊仲帶住一大批美國大型企業高管，包括多位商界巨頭，顯示白宮希望今次能帶返農業合作同中國對美投資嘅具體承諾。不過，到目前為止，更多係隆重嘅歡迎場面，而非實質性突破。

值得關注嘅係，習近平喺致辭時特別提到「修昔底德陷阱」。呢個概念源於古希臘歷史學家修昔底德，後來被哈佛大學教授艾利森（Graham Allison）喺2017年嘅著作中用嚟分析中美關係。艾利森考究過歷史上新興大國挑戰現有霸主嘅16個案例，指出當中有12次最終都係以戰爭收場。

習近平喺會上三次反問：中美兩國到底可唔可以跨過呢個「修昔底德陷阱」，開創大國相處嘅新典範？而艾利森喺接受 CNBC 訪問時就分析指，其實習近平同特朗普私底下都無意開戰，雙方有默契會將台灣問題留待更長遠嘅時間去解決。佢估計，除非台灣作出嚴重挑釁，否則中國今年內封鎖台灣嘅機率唔夠 1%。