美國總統特朗普相隔9年再次訪華，周四（14日）早上10時在北京同國家主席習近平會面。習近平為特朗普舉行歡迎儀式，並親自迎接，兩人握手。特朗普出席歡迎儀式後，喺人民大會堂同習近平舉行雙邊會談。

習近平表示，事實一再證明，貿易戰冇贏家，中美經貿關係嘅本質係互利共贏。佢指出，面對分歧同摩擦，平等協商先係唯一正確選擇。雙方經貿團隊昨日（13日）已經達成總體平衡、積極嘅成果，對兩國人民、以至對世界都係好消息。習近平話，雙方應該一齊維護好目前得來不易嘅良好勢頭。

特朗普就表示，今次訪華係一項莫大榮譽，佢特別高興見到歡迎儀式上嘅小朋友，認為意義重大。特朗普話，佢同習近平認識已經好耐，雙方一直保持良好關係，即使有分歧都能夠解決。他說，兩人會互相致電，有問題時亦可以好快處理，相信中美兩國會有美好嘅共同未來。

習近平喺會談中表示，雙方今次會面可以話係舉世矚目。佢指出，當前百年變局加速演進，國際形勢變亂交織，世界正走到一個新嘅十字路口。習近平向特朗普提出一系列問題，包括中美兩國能否跨越所謂「修昔底德陷阱」，開創大國關係新範式；能否攜手應對全球挑戰，為世界注入更多穩定性；又能否着眼兩國人民福祉同人類前途命運，共同開創中美關係更好未來。

習近平表示，呢啲問題可以講係歷史之問、世界之問、人民之問，亦係兩國領導人需要共同書寫嘅時代答卷。佢認為，中美之間共同利益大於分歧，中美各自成功，對彼此都係機遇；中美關係穩定，對世界亦係利好。習近平話，雙方合則兩利，鬥則俱傷，應該做夥伴而唔係對手，互相成就、共同繁榮，走出一條新時代大國正確相處之道。

對於台灣議題，習近平強調，台灣問題係中美關係之中最重要嘅問題。佢指出，處理得好，兩國關係就可以保持總體穩定；處理唔好，兩國就可能發生碰撞甚至衝突，將整個中美關係推向十分危險嘅境地。習近平又話，「台獨」同台海和平水火不容，維護台海和平穩定，係中美雙方最大公約數。

習近平又提到，過去一年多，中美關係遇到唔少波折，但仍然保持總體穩定局面，而呢個局面來之不易。佢強調，中方致力於中美關係穩定、健康、可持續發展。習近平表示，期待同特朗普就事關兩國同世界嘅重大問題交換意見，共同為中美關係呢艘大船領好航、掌好舵，令2026年成為中美關係繼往開來嘅歷史性、標誌性年份。

特朗普則表示，自己同習近平相識已久，並形容喺兩國關係史上，任何一任美國總統同中國國家主席之間，都冇比佢哋更長久嘅關係。佢話，雙方一直保持良好關係，彼此相處融洽，即使遇到困難，都能夠妥善解決。特朗普又話，相信中美有「美好嘅共同未來」。

特朗普喺會談中表示，佢會打電話畀習近平，習近平亦會打電話畀佢。佢話，外界未必知道，每當雙方遇到問題時，兩人都能夠非常迅速咁解決。特朗普又讚揚習近平係一位偉大領袖，話對任何人嚟講，習近平都係一個 great leader；即使有時其他人唔鍾意佢咁講，佢都會照樣講出嚟。

特朗普亦表示，今次隨行訪華嘅美國企業團隊都係世界頂尖，佢哋今次嚟中國，係對中國同習近平主席嘅敬意。今次陪同特朗普訪問北京嘅美國企業家，包括英偉達創辦人黃仁勳、蘋果行政總裁庫克、特斯拉同SpaceX創辦人馬斯克等，大約30位美國商界代表。

特朗普又話，今次訪華團隊入面，有一批最出色嘅商人，佢期待同中國做生意，並確保雙方能夠互惠共贏。特朗普最後表示，佢非常期待今次會談，並引述有人形容，今次會面可能係歷史上最重要嘅峰會之一。