俄羅斯總統普京喺舉行完二戰勝利日81周年閱兵後，召開記者會，罕有咁指俄烏戰爭已經「接近尾聲」，仲點名德國前總理施羅德 (Gerhard Schröder) 做佢心目中嘅歐洲調停人。同一場記者會上，普京亦重提俄方願意接收同儲存伊朗濃縮鈾嘅方案，企圖喺中東僵局中重新搵返莫斯科嘅角色。

普京當日喺記者會回應有關西方對烏軍援是否「過火」嘅提問時表示：「我認為呢件事正接近尾聲。」佢指西方持續一步步升級同俄羅斯嘅對抗，警告歐盟「呢場博弈會令你哋付出沉重代價」。對於有沒有意願同烏克蘭總統澤連斯基 直接會面，普京話自己「從來冇拒絕過」，更表明可以喺莫斯科、亦可以揀第三國見面，但前提係雙方先要達成一份持久嘅和平協議。

歐洲理事會主席科斯塔 (António Costa) 之前亦放風，話歐盟已準備好喺時機成熟時，分別同俄羅斯同烏克蘭舉行單獨會談。當被問到心目中最理想嘅歐盟調停對象時，普京就直接點名施羅德。

施羅德1998至2005年間擔任德國總理，係社民黨人，亦係普京喺西方世界少數仍然維繫私交嘅政界人物。佢卸任後喺多間俄羅斯能源企業擔任高薪要職，俄烏戰爭爆發後仍堅持唔同會同莫斯科切割，喺德國國內被批評為「失格前總理」。施羅德辦公室收到查詢後表示「不予置評」，暫時佢成為調停人嘅意願仍然成謎，但喺2022年戰爭初期，佢曾經親身飛去莫斯科會見普京試圖斡旋，因此今次普京點佢名，係有一定考慮。

至於戰場形勢，烏克蘭近一年承受嘅壓力其實有增無減。德國基爾世界經濟研究所 (Kiel Institute) 最新數據顯示，特朗普政府自重返白宮之後，喺2025年將美國對烏軍援幾乎壓縮至零；但歐盟國家同時將對烏軍援提升67%，由德國同英國孭起大頭，整體軍援水平接近彌補咗美方缺口。換言之，普京口中嘅「結束」並非烏克蘭已經頂唔順，而係莫斯科自己亦不得不面對戰線消耗同國際格局轉變。

今年莫斯科紅場嘅勝利日閱兵明顯縮水，現場主要係俄羅斯親密盟友嘅領導人出席。最受外界注目嘅，係今次閱兵冇展示任何軍事裝備，係近廿年來首次。普京解釋，呢個安排係因為俄軍要集中力量「喺特別軍事行動中徹底擊潰敵人」，而非受制於基輔嘅威脅。

談到伊朗局勢，普京表示希望戰爭「越快結束越好」，又警告如果衝突持續升級，「最終冇人會係贏家」。佢指出，作為結束伊朗戰爭協議嘅一部分，俄方準備好負責運輸同儲存伊朗嘅濃縮鈾，「我哋有經驗，亦準備好再做一次」。佢提及2015年俄羅斯曾喺《聯合全面行動計劃》(JCPOA) 框架下，將約300公斤濃度19.75%嘅伊朗濃縮鈾，由福爾多 (Fordow) 設施運往俄羅斯諾沃烏拉爾斯克 (Novouralsk) 儲存，當年連以色列都同意。

不過普京承認，方案如今卡咗喺死胡同：「美國嘅立場變得強硬，要求必須將呢批濃縮鈾運往美國。再之後，伊朗嘅立場亦變得強硬。」據多間外電報道，特朗普政府已經明確拒絕由俄羅斯做中間託管人，堅持伊朗濃縮鈾必須交予美方保管，伊朗則拒絕將核材料直接交美，自己留返喺國內。普京強調，相關提議「依然擺喺枱面」，俄方會繼續同華盛頓同德黑蘭保持溝通。