距離特朗普出訪北京嘅日子愈來愈近，台灣議題會係今次「川習會」其中一個重頭戲。據外媒分析，習近平今次將台灣議題擺上議程最高位置，外界憂慮特朗普會以美國對台軍售或表態作為籌碼，換取北京喺貿易、稀土供應同烏克蘭戰爭問題上嘅讓步。台北方面尤其擔心，特朗普會否將美國長期以來「不支持」台獨嘅措辭，鬆動為「反對」台獨，動搖台美關係嘅基本盤。

同時間，近日台灣立法院三讀通過「縮水版」國防特別預算條例，總額上限7800億元新台幣，比行政院原本提出嘅1.25兆規模足足砍咗三分一，只保留對美軍購項目，本土防務建設經費大減。本土無人機國產、委製同供應鏈建設等經費全部被削減。民進黨批評呢個「打六折」版本，可能會令台美合作停擺；但藍白陣營就話，集中資源買美國武器，先至係強化不對稱戰力嘅務實做法。美國國務院雖然表達支持，但同時警告，若台灣未來再有國防預算延宕，就會被視為對中國大陸嘅「讓步」。

就在呢個敏感時刻，國民黨主席鄭麗文選擇向國際媒體發聲，接受CNN專訪，佢明確表態：「台灣不想成為下一個烏克蘭」，單靠武器無法保證台灣安全，更唔應該被迫喺華盛頓同北京之間二選一，成為大國競爭下嘅棋子。並表示：「同美國保持友好關係，並唔一定意味住對中國懷有敵意。」佢強調國民黨支持深化台美合作，同時主張兩岸要維持穩定溝通，避免誤判同衝突升溫。

面對「藍白擋軍購」嘅質疑，鄭麗文反駁話國民黨「堅定支持台灣國防」，但唔可能畀行政院「空白授權」，強調國會有責任替人民睇緊荷包。佢同民眾黨主席黃國昌就軍購預算多次協商，黃國昌亦話雙方溝通順暢，係按照美方發價書（LOA）金額分期籌編，唔係漫天喊價式嘅抽象數字。

至於同北京嘅互動，鄭麗文喺幾個星期前親身赴大陸訪問，喺北京同習近平會晤，係近十年以嚟國共兩黨最高領導人首度面對面接觸，被外界稱為「鄭習會」。佢表示：「表面上睇起嚟，我同習近平似乎有共同語言。但正正因為兩岸之間存在咁多差異，我哋更加要搵到一個共同基礎。我相信，呢個係避免台海戰爭爆發嘅唯一路徑。」

佢同時提出一個野心勃勃嘅戰略構想，將過去冷戰時期具軍事對抗色彩嘅「第一島鏈」，逐步轉化為連接日本、南韓、台灣、中國大陸沿海同東南亞嘅經濟與交流節點，打造一條「和平繁榮之鏈」。鄭麗文話，東亞唔應該淪為零和博弈嘅戰場，而應該成為帶動全球和平繁榮嘅重要力量。

鄭麗文亦承認北京方面已經明確表示，如果台灣走向獨立「會使用武力」。但佢仍然堅持，接觸同對話可以紓緩緊張局勢，並承諾若國民黨重新執政，軍事對抗將會減少，「戰爭嘅可能性將被完全避免」。

外界自然關注鄭麗文嘅政治盤算。被問到2028年會否角逐總統大位，佢聰明咁迴避左，強調目前主力放喺今年嘅地方選舉同2026、2028兩場選戰嘅備戰工作。佢拋低一句意味深長嘅話：「我認為，未來兩到三年，將係決定台灣命運嘅關鍵時刻。」

鄭麗文喺專訪中重申，台灣位處印太關鍵位置，同美國同中國大陸都有重要關係，因此真正需要嘅係和平、穩定同發展，而唔係被推向對抗。她預計下個月會訪美，雖然行程未完全敲定，但華盛頓應該係重點。熟悉台美關係嘅藍營人士透露，軍購預算通過之後，鄭麗文訪美嘅「警報」已經解除，但即將舉行嘅「川習會」仍然帶來變數，外界密切關注中美雙方會唔會達成一系列交易，台灣命運又會受到幾大影響。

呢一刻，台灣正處喺關鍵十字路口。2026年地方選舉即將來臨，鄭麗文強調未來兩到三年，將決定台灣命運。雖然鄭麗文暫時迴避2028年總統選舉話題，但外界已將佢視為藍營未來嘅重要領袖。