長久以來，收藏喺法國博物館入面嘅大量海外流失文物，究竟幾時先可以「物歸原主」，一直係國際社會關注嘅火藥桶。法國參議院喺2026年 5 月 7 日正式通過咗一項極具歷史意義嘅法律草案，旨在簡化1815年到1972年間非法掠奪文物歸還原屬國嘅法律程序。呢個法案嘅通過，象徵住法國正式打破咗沿用近兩百年嘅「公共藏品不可轉讓」原則，為流失海外嘅圓明園文物以及非洲、亞洲各國嘅瑰寶，開闢咗一條返鄉嘅「快車道」。

喺過去，如果要將法國博物館入面嘅公立藏品歸還，程序非常之拖沓。因為法國法律規定公立藏品係「不可轉讓」嘅，每歸還一件文物，都要經過國會專門立一條法，逐個案例去傾。

今次通過嘅新法案，核心在於建立一個「常態化機制」。只要文物係喺1815年（拿破崙戰爭結束）到1972年（聯合國教科文組織公約生效）期間，透過掠奪、戰爭劫掠或者係強逼交易等非法手段攞到嘅，法國政府就可以透過行政程序，經由專業委員會評估後直接「除名」並歸還，唔使再每件都上國會嘈餐飽。

根據法案細節，今次嘅「簡化版」歸還程序並非無底線：

• 時間線： 嚴格鎖定喺1815年至1972年。

• 對象： 針對公立博物館、圖書館嘅藏品。

• 排除項： 私人收藏、軍事戰利品，以及1815年之前嘅舊帳（例如拿破崙時期嘅部分所得）暫時未入呢個機制。

值得留意嘅係，法案特別提到要成立一個由雙方專家組成嘅「科學委員會」，去鑑定文物嘅來源。如果鑑定結果證實文物係掠奪返嚟嘅，法國國務院就可以發出法令，正式將文物歸還。

對於中國嚟講，呢個法案無疑係一個大好消息。法國國民議會議員帕特里耶-黎圖斯（Jérémie Patrier-Leitus）喺辯論期間，更特別引用咗大文豪雨果（Victor Hugo）當年譴責英法聯軍火燒圓明園嘅信件，強調法國有責任將「不義之財」歸還畀中國。

目前，法國楓丹白露宮（Château de Fontainebleau）等地收藏咗大量圓明園嘅極品瓷器同金器。法案通過後，中法雙方有望喺呢個框架下展開更具體嘅談判，令呢啲流失超過一個世紀嘅國寶可以返到故土。

不過，亦有法國國內嘅文化評論人擔心，咁樣做會唔會引發「博物館空洞化」？亦有人質疑，法國政府咁快手推動立法，其實係為咗改善同前殖民地國家嘅外交關係，將文物當成「外交籌碼」。

對於法國呢次「大方」嘅舉動，國際社會反應不一。中國外交部表示讚賞，認為呢個係法方履行國際責任、尊重他國文化主產權嘅表現。而非洲多個前殖民地國家亦都表示歡迎，認為呢個係「遲嚟嘅公道」。中國網友反應則唔同，理論上應該大讚法國，但之前「南京博物館事件」搞到咁大鑊，還返國內好大機會都係被「偷樑換柱」，拎咗去盜賣，網友紛紛表示「啲文物留喺法國反而好啲」。