根據《自由亞洲電台》18號報導，中國平價手搖飲品牌「蜜雪冰城」，其位於湖北嘅一間門店近日被媒體揭發，將切片檸檬常溫存放至隔日繼續再賣，但卻「意外哋」，有唔少消費者選擇原諒，有人認為，面對經濟不景，價平就得，望「蜜雪冰城」繼續存活。並有人批官府以為自己「執到槍」，應管嘅唔管「真係太得閒」。

上周五（14日）湖北「經視直播」節目踢爆涉事門巿，指其員工將當日用淨嘅「檸檬、甜橙」切片，置於不鏽鋼桶中常溫存放，隔日又繼續使用，但依「蜜雪冰城」總部要求，鮮橙、檸檬須現切現用，如未用晒，收工時須全數棄置；記者並發現「烏蠅、飛蟲」在膠杯蓋內亂爬，更有杯蓋被洗清後繼續用。

《北京青年報》在周一17號報道指，湖北省 宜昌市市監局副局長，當日帶隊赴涉事門店，在二樓倉庫搵到餘下嘅原材料，並指其涉嫌標簽不實，予以立案調查。有關「平價不是蜜雪冰城的萬能擋箭牌」主題，隨即衝上微博熱搜。

然而，公眾不只冇責怪「蜜雪冰城」，反紛紛企到「蜜雪冰城」一邊，唔少消費者表示，自己同經常食隔夜生果「試問有乜問題？」。另有民眾表示「平就得、隔夜於否似乎冇乜所謂」。

另有人直指「唔係我哋對其容忍，而係因為有其他更貴嘅品牌，使用嘅原料完全不合格，對比之下更加刷新大家嘅底線」。暗指當局對違法情事「視而不見」，通融用化學料調製飲品嘅奸商。

蜜雪冰城以「極致性價比」作賣點，主打5至10蚊人紙就有一杯飲品，冰鮮檸檬水就係其熱銷品項之一，2024年前9個月，蜜雪冰城在中國就賣出約11億杯冰鮮檸檬水。

網上有位名為「麥杰遜」嘅網民撰文指，使四蚊買一杯檸檬水嘅人，早已默認嗰杯嘢係「添加劑兌水」嘅真相，如今媒體曝光蜜雪冰城用隔夜檸檬片，反令消費者感覺「中彩票」，究竟係乜原因導致今時今日嘅人民「企在誠實用料嘅一方」。

因為中國消費者終於知道，原來「蜜雪冰城」係用真材實料嘅生果整飲品俾大家飲。報導指出，公眾肯定知道食安不應有「平價特權」，但大家更知道各自有房貸要還、有孩要養、有加班要熬，當生活本身已成為「細菌培養液」，仲有精力對一杯檸檬水吹毛求疵咩？