英國國家統計局（ONS）喺今日（22日）公布最新數據，顯示3月份整體通脹率升到3.3%，比起1月同2月嘅3%明顯上升。如果按月計算，消費者物價指數（CPI）喺3月上升咗0.7%，反映物價壓力喺短時間內都有明顯增加。如果扣除能源同食品價格，核心通脹按年上升3.1%，整體通脹仍然維持喺偏高水平。

根據MoneyWeek嘅分析，市場原本普遍預期，英國3月CPI按年升幅大約係3.1%。超出預期嘅背後主要原因，好明顯就係霍爾木茲海峽自3月初開始，實際上處於接近封閉狀態，油價急升，而油價一升，唔止油貴，基本上所有商品同服務成本都會跟住一齊升。

不過，通脹數字本身只係表面。真正更加令人擔心嘅，其實係國際貨幣基金組織（IMF）喺4月14號出嘅經濟展望報告。根據CNBC報道，IMF已經將英國2026年經濟增長預測，由1月時估嘅1.3%，大幅削到只得0.8%。而且，喺七國集團入面，英國係被削得最多嗰個。IMF仲講得好清楚，英國會係所有已發展經濟體入面，受伊朗戰爭衝擊最嚴重嘅國家。

點解偏偏英國咁脆弱？IMF分析，關鍵原因好簡單——英國係一個淨能源進口國。美國有頁岩油，可以自己頂住一部分；但英國唔同，能源供應高度依賴國際市場。當霍爾木茲海峽一被封鎖，油價衝上接近每桶100美元，英國嘅能源進口成本就即刻爆升。IMF仲指出，原本市場期待減息，但而家減息步伐勢必放慢，再加上高能源價格可能一路拖到出年，呢啲都會繼續壓住英國經濟。

根據Scottish Financial News報道，IMF估計英國2026年通脹率會去到3.2%，同七國集團最高水平睇齊。更加令人不安嘅係，IMF仲估通脹短期內有機會升近4%，之後要去到2027年底前，先可能慢慢回落返英倫銀行2%目標水平。換句話講，英國人唔係捱一兩個月，而係起碼要捱一年半高物價。

呢度就出現咗一個經濟學上最麻煩嘅局面——滯脹。所謂滯脹，即係經濟增長停滯，但通脹又同時高企。根據Kaeltripton分析，英國而家面對嘅，正正就係典型滯脹風險：一方面，經濟增長得0.8%，基本上等於冇乜郁；另一方面，通脹又企喺3%以上，仲有機會再上。呢種情況最頭痕係咩？就係央行會進退失據。如果加息去壓通脹，原本已經弱嘅經濟會再俾人打多一棍；但如果減息去救經濟，通脹可能又會再升。英倫銀行喺3月貨幣政策會議上決定維持利率喺3.75%不變，其實正正就反映呢個為難嘅局面。

根據IBTimes UK報道，更差嘅情景係，如果伊朗戰爭拖落去，而能源價格又繼續企高，英國到2027年中之前，可能有25萬人失業。IMF認為伊朗戰爭已經打斷咗全球經濟原本嘅增長勢頭，全球通脹率預計會升到4.4%。如果衝突再升級，全球經濟增長甚至可能跌到只得2%，即係好接近全面衰退邊緣。CNBC亦引述多位央行官員同政治人物警告，伊朗戰爭帶嚟嘅全球風險，可能遠遠大過市場而家所反映出嚟嘅程度。

咁香港會點？其實英國而家嘅情況，對香港係一個警號。香港同樣都係高度依賴能源進口嘅經濟體，國際油價一升，遲早都會經電費、交通費、運輸成本、食品價格，一層一層傳返入香港消費市場。再加上港元同美元掛鈎，香港貨幣政策本身冇太多自主空間。如果美國自己都面對滯脹壓力，唔敢輕易減息，咁香港嘅按揭利率同商業借貸成本，亦都會繼續企高。

如果再由宏觀經濟理論角度解釋，點解滯脹咁難搞？因為佢直接打破咗傳統菲利普斯曲線嗰套思維。正常情況下，經濟差，需求跌，物價應該會跟住落；咁央行只要減息，就可以刺激返經濟。但滯脹唔係咁，佢係經濟又差、物價又升，同時發生。根本原因通常唔係需求過熱，而係供應端出事。

對亞洲，尤其係依賴出口嘅經濟體嚟講，英國同歐洲一旦因為高通脹同低增長而削弱消費力，外需就會跟住縮。至於持有英鎊資產嘅投資者，亦都要留意，英鎊喺滯脹壓力之下，存在進一步貶值風險。呢啲連鎖效應，最終都會經貿易同金融渠道，一層層傳返嚟香港，影響本地經濟前景同資產價格。

所以，英國今日呢份CPI數據，唔只係一個英國通脹數字咁簡單。佢其實係畀全球市場睇到，戰爭、油價、供應衝擊，已經開始由中東戰場，實實在在咁傳導到發達國家經濟入面。而一旦滯脹格局真正成形，之後要處理，就唔會係一兩次減息加息可以解決到嘅事。