根據台灣《中央社》29號報導，在網路興起、傳統媒體日漸式微之下，屬於上海市官媒嘅「上海廣播電視台」，日前宣佈將會撤併「東方衛視中心、紀錄片中心、舊融媒體中心」，建立一個全新嘅「融媒體中心」，並將關停4個電視頻道及4個廣播頻率，大減40%嘅傳統頻道頻率。

綜合「上海廣播電視台」官網及網路訊息，隸屬於「上海文廣集團」嘅「上海廣播電視台」，在25號召開「改革發展大會」，會上正式宣佈中共上海市委「宣傳部」批覆嘅上述整併方案，同時為新整合而成嘅「上海廣播電視台融媒體中心」舉行揭牌儀式。

上海市官方標榜，上述方案係全面開啟「上海廣播電視台（集團）」新一輪改革「高質量發展的新徵程」，並可真正實現「主業更加突出、特色更加鮮明、效益更加改善」嘅目標。

根據呢項被稱為「改革行動方案」嘅整併方案，在未來5年內，上海廣播電視台將全面實施「新聞立台、文化興台、融合強台」嘅核心戰略，聚力鍛造「主流媒體頭部平台」，著重強化廣播電視及網路「台網並重、智能引領、移動優先、首發原創」等基本策略。

呢套方案並宣示，用「人工智慧」（AI）重塑媒體技術底座，加快推進「智慧化、超清化、行動化」發展，大力培育媒體「新質生產力」，不斷提升「核心競爭力」。

上海廣播電視台台長兼總編輯 方世忠表示，呢項方案將「新聞立台」作為改革嘅著力點，做強新聞媒體嘅主責主業，撤併「東方衛視中心、紀錄片中心、舊融媒體中心」，組建全新嘅「融媒體中心」。並推動《第一財經》構築「廣播、電視、報紙、雜誌、網路」五位一體嘅「垂類新聞全媒體平台」。

方世忠指出，方案關鍵詞之一就係「瘦身」。將「精簡精辦」作為改革突破點，堅決摒棄「做虛功、圖虛榮、變虛胖」，要強身健體、提質增效。因此，有序關停4個電視頻道及4個廣播頻率，大力壓減40%嘅傳統頻道頻率，真正實現「主業更加突出、特色更加鮮明、效益更加改善」。

方世忠另表示，要培養一批「名主持、名記者、名編輯、名導演、名製作人、名工程師」，建設「塔頂更尖、塔體更強、塔基更厚」嘅媒體人才大廈，打造一支「充滿激情、富於創造、勇於擔當、追求卓越」嘅幹部人才隊伍。

網上有網民表示，連經濟發達嘅上海都尚且如此，其他經濟唔發達嘅省份就更佳唔好講啦，地方冇錢做節目、冇企業買廣告，省級電視台營運問題將會更加突出，加上節目過於一致、政治宣傳意味濃厚，早已吸引唔到觀眾收睇。

亦有網民認為，在大環境不佳嘅情況之下，電視廣播行業降薪趨勢勢在必行。有報導指出，地方電視台降薪幅度平均已達50%以上，有南方某電視台自上個月起，只係發得出38%嘅薪資。更有「上海電視台」主播在網上控訴，指公司發唔出工資，主播被逼要直播帶貨。

有疑似前行家嘅網民留言指，已經對過去服務過嘅電視台提告，並稱自18年起，該電視台就唔能正常發工資，期間更斷斷續續拖欠社保、公積金。另有在職行家表示，自己所屬間電視台裁員達2000人，留下嘅4000人全部要減薪三分一。

上個月末有報導指，中國全國範圍內有近2000間縣級電視台面臨倒閉，大量媒體從業員就此失業，消息一出各界熱議。中媒《搜狐網》報導稱，有數據顯示截至2023年底，中國已有近700間縣級電視台停播或關閉，而且倒閉潮嘅勢頭正不斷擴大中。

其實早在8月初就有報導指，深圳電視台在日前宣佈，自今年8月10號起將停播「公共頻道、娛樂頻道」兩個電視頻道。深圳電視台公共頻道自1996年開播有線電視購物頻道，在2005年更名為公共頻道，深圳電視台將其定位於粵語主流頻道。

在有關報導嘅評論區中，網友嘅真實想法「更貼地」，有網友表示，睇電視嘅觀眾更鍾意睇啲貼近生活嘅內容，係大家「喜聞樂見」嘅而非「高大上」嗰啲。有網民認為，電視播放嘅民生問題較多，其普及性較貼近民眾，可直接反映到身邊問題。

部分網民認為，確實有人願意接受傳統電視，但現時部分電視台嘅味道已經轉變，一來就係宣傳帶貨、電視購物、報喜不報憂，諸如此類嘅消息越來越多。

另外更有「離晒譜」嘅電視台主持不時「眉頭深鎖」，扮演「社會良心」反問你：點解你老百姓有錢都唔使錢嘅？咁離地嘅叫賣模式引起觀眾、消費者反感，甚至拒絕打開電視收睇。