中國電動車市場長期捲入惡性削價戰，搞到利潤愈來愈少，唔少車廠周轉緊絀。有外媒引述數據報道，超過三分之一喺內地上市嘅車企，目前流動負債已經高過流動資產，其中以比亞迪情況最嚴重，引起市場關注，擔心有車廠最快出年就會因資金鏈斷裂而執笠。

比亞迪截至上年年底嘅財務報表顯示，佢嘅流動資產約有3,710億元（人民幣），但流動負債就高達4,960億元，即係出現1,254億元嘅營運資金赤字，仲比兩年前升咗成36%。其他例如吉利、蔚來、賽力斯、北汽、江淮汽車等都被指出資金壓力非常大。

根據統計，2021年上半年16間主要車廠總共仲有2,905億元淨流動資產，但去到2023年底已經跌到得番1,043億元，足足蒸發咗六成以上。業界話，現金流愈用愈快，資金缺口愈嚟愈大，會進一步加劇行業整體嘅流動性風險。

中信證券嘅汽車產業分析師殷信馳指出，照住目前走勢推斷，最快去到2026年，中國車企可能會進入一個新一輪行業大洗牌，部份資金鏈頂唔住嘅企業會被淘汰。他仲話，一旦有車企斷資金鏈，對成個汽車產業會造成好大衝擊。

依家車廠削價競爭得咁激烈，連中國政府都開始留意。比亞迪近日一再大幅減價，外界更有人直指佢已經係「汽車版恆大」。長城汽車董事長魏建軍早前都講過，有啲車廠淨係顧住炒股，唔理實際經營風險，直言「汽車界嘅恆大其實已經出現，只係未爆」。

為咗處理資金鏈問題，中國工信部部長李樂成最近提出要整治內卷亂象，之後包括比亞迪喺內，多間車企都承諾會將向供應商付款期縮短至60日內，試圖舒緩拖數問題。但有業內人士話，依家車廠本身現金周轉都好緊，如果要硬性執行縮短付款期，對好多微利經營嘅企業嚟講等同逼入絕路，可能反而加速倒閉潮。

根據資料，今年第一季內地車企平均利潤率得3.9%，比去年同期跌咗0.7個百分點，雖然比亞迪表現叫做略為好啲，但成個行業壓力仍然好大。至於比亞迪方面，暫時未對外界報道作出回應。