特朗普第二任任期啱啱展開，白宮內部已再現裂痕。根​據多家媒體報道，國防部長赫格塞斯近日多次捲入使用私人 Signal 通訊群組洩露軍事資訊嘅醜聞，事件引起國會同國際盟友高度關注，亦​導致多名顧問離職。

赫格塞斯分別喺兩個 Signal 群組入面分享涉及也門空襲計劃嘅敏感資訊，群組成員包括非政府人士，例如佢嘅配偶、兄弟同私人律師。由於​部分資料更屬於機密級別，令事件一度升級為外交同國安危機。​有國防部消息指出，相關通訊行為明顯違反通訊保安規定。​雖然白宮起初公開力撐赫格塞斯，聲稱事件係「內部阻力破壞改革，屬假新聞」。白宮新聞秘書卡羅琳亦表示：「呢件事反映五角大樓內部部分勢力反對國防部改革，總統對赫格塞斯仍然充滿信心。」​不過根據《NPR》引述匿名高層消息，白宮其實已經開始物色接任國防部長嘅人選。​

民主黨參議員里德（Jack Reed）表示：「呢件事唔可以等閒視之，涉及軍事透明同人事制度公信力，赫格塞斯應該接受徹底調查。」​就連共和黨參議員威克（Roger Wicker）都話：「國防部長呢個職位需要高度判斷力同紀律，任何保密違規行為都唔可以當做小事。」​

事實上，五角大樓已經就事件啟動內部紀律調查，同赫格塞斯關係密切嘅數名顧問相繼被撤換。​被撤換嘅顧問事後發聲明，否認有違規行為，並批評白宮操作欠缺透明度。​

有評論指出，事件唔單止係國防部嘅運作問題，更反映咗特朗普政府人事策略嘅潛在風險。​國防政策專家喺接受 CNN 訪問時話：「當官員之所以得以留任，是基於忠誠而非能力時，政策品質與國家安全風險自然會同步上升。」​

與此同時，白宮內部亦傳出關稅政策上嘅分歧。​白宮顧問納瓦羅同 Tesla 行政總裁馬斯克喺對外經貿政策上爆發爭執。​納瓦羅主張強硬徵稅，而馬斯克就批評對方嘅商人觀點「愚蠢且有損經濟」，並警告現行關稅政策已對 Tesla 供應鏈造成衝擊。​特朗普並無公開介入調停，而白宮發言人僅回應稱「多元意見係健康現象」。​

CNN 引述白宮內部人士透露，目前白宮決策圈已呈現「分裂化趨勢」，總統仍然偏好起用缺乏政治經驗嘅官員，並對國安同外交專業機構愈趨疏遠。​有觀察家認為，特朗普傾向鼓勵官員之間競爭而唔係合作，進一步加劇施政混亂。​

Signal 洩密風波未息，美國國會將進一步召開聽證會，並審視五角大樓相關人事安排。​雖然白宮目前未有進行重大人事變動，但有專家認為，如果事件繼續發酵，特朗普未必可以保得住赫格塞斯。​