香港舉重健力總會主席葉永玉，尋日（24日）在伊利沙伯體育館舉行「香港舉重邀請賽2024」，總會主席葉永玉致詞時，將香港形容為「比較細嘅國家」，引發軒然大波。有立法會議員表示不滿。港協暨奧委會要求舉重健力總會交報告解釋。另外，尋日三項鐵人世界盃香港站，主辦方將冠軍英國國歌播錯西班牙，中國香港三項鐵人總會就只表示會內部檢討。

舉重健力總會晚晚發聲明澄清，指葉永玉當時解釋國際舉重總會(IWF)處理會籍嘅時候，會俾較細嘅國家或地區，可以一個總會管理多個項目，因口文之誤，令人誤會，對演講引起嘅誤會及紛爭向社會及公眾致歉，強調完全冇港獨嘅意思，會方堅決支持同擁護基本法及一個中國原則，反對一切分裂國家嘅行為。

新民黨立法會議員何敬康表示，總會之前亦曾經影合照嘅時候，倒掛區旗，舊年亞洲經典健力錦標賽亦曾經誤將《願榮光歸香港》當國歌播放，認為總會一再犯錯不能接受，佢要求港協暨奧委會暫停舉重健力總會嘅會籍，徹查事件。

葉永玉表示，尋日已向港協暨奧委會解釋事件，暫時無補充。至於是否需要暫停會籍，佢指係港協暨奧委會嘅決定，佢不便評論。

港協暨奧委會尋晚回應事件，指經同舉重健力總會了解後，初步認同事件係一時口誤，同埋得悉總會已發表聲明及公開致歉。港協強調，香港係中國一部份嘅事實毋庸置疑，將再次提醒屬下各體育總會，在參與相關交流活動嘅時候，對於國家主權同埋「一國兩制」嘅論述絕不能有所含糊。

文化體育及旅遊局表示，政府非常重視事件，港協暨奧委會正向總會了解詳情，同埋已要求總會就事件提交報告。

至於警方則指，危害國家安全嘅行為同活動係非常嚴重嘅罪行，必定依法防範、制止同埋懲治。至於某啲行為會唔會觸犯《港區國安法》或《維護國家安全條例》，就視乎相關情況，包括事實、相關嘅行為同埋意圖、所得嘅證據等因素而定，同埋會根據相關法律處理。

另一邊廂，三項鐵人世界盃香港站尋日喺中環、灣仔一帶舉行，但喺頒獎典禮期間發生播錯國歌事件。賽事中，英國選手Sian Rainsley贏得女子精英賽冠軍，但喺頒獎播國歌嘅時候，現場卻錯誤播出西班牙國歌近40秒，之後先更正。

中國香港三項鐵人總會回覆傳媒查詢表示，對早前女子精英組頒獎典禮播錯國歌深表抱歉，已即時作出更正，同埋向得獎運動員致歉，大會亦將會作出內部檢討，避免同類型事件再次發生。

有網民就表示「自己播錯就話係小插曲，真係叻呀」「你想檢討就了事，你話人哋播錯你國歌就發酵又發酵，搞足幾個月」「播錯？ 人哋播錯又話要點要點，又反黑組又話去韓國拉人」。