中國駐新加坡大使館今日(18日)呼籲喺新加坡嘅中國公民，遠離所有形式嘅賭博，因為海外賭博係違反咗中國嘅法律。

北京而家正加大力度，打擊中國公民喺東南亞嘅賭博活動。東南亞係一個受中國人歡迎嘅旅遊目的地。

中國駐新加坡大使館喺一份聲明度，「鄭重提醒」喺新加坡嘅中國公民，要提高法律意識，遠離賭博。

聲明指出，中國法律嚴禁賭博，刑法修正案已經將跨境賭博列入刑事罪行，嚴厲打擊跨境賭博違法犯罪活動。即使境外賭場合法開設，中國公民跨境賭博都涉嫌觸犯中國法律，特別係參與組織賭博、賭局等，都會被依法追究責任。對於違法行為，使領館可能無法提供領事保護。

聲明仲指出，賭博可能導致沉迷，輕則賭債纏身、家財散盡，重則妻離子散、家破人亡。跨境賭博仲可能帶嚟詐騙、洗錢、綁架、拘禁、拐賣、偷渡等風險。

中國駐新加坡大使館又表示，中國公安部已經開通打擊治理跨境賭博綜合舉報平台，如果有掌握中國公民喺境外開設或經營賭場、組織招攬中國公民赴境外賭博或參與跨境網絡賭博相關線索，可以透過舉報郵箱、傳真、微信公眾號舉報。

翻查資料，中國駐南韓同埋駐斯里蘭卡大使館，都發出咗類似嘅警告。

根據中國駐菲律賓大使館嘅一份聲明，今年2月22日，中國同菲律賓嘅執法機構合作遣返咗40多名從事離岸賭博嘅中國公民，聲明指：「中國政府一直反對任何形式嘅賭博，反對中國公民離開中國，從事賭博業」。

除此之外，中國同越南嘅公安部長已經同意加強執法合作，並簽署咗關於共同打擊跨境賭博嘅諒解備忘錄。

對於呢單新聞，有唔少網民不約而同表示，咁內地客去澳門賭錢，咁又有冇犯法呢？根據中國《刑法》第303條規定，組織他人出境賭博或者在境外開設賭場的，處三年以下有期徒刑或者拘役，並處罰金；情節嚴重的，處三年以上十年以下有期徒刑，並處罰金。

而澳門係中華人民共和國嘅一個特別行政區，根據《澳門特別行政區基本法》規定，澳門可以在本地區進行賭博活動。因此，中國公民去澳門旅遊去賭博並唔違法。不過要留意嘅係，中國公民喺澳門賭博贏得嘅錢，在帶回中國大陸時，需按照規定繳納個人所得稅。