近日，有內地博主使用人工智能（AI）技術生成影片同聲音，將已故歌手李玟「復活」，背後目的喺宣傳佢嘅「復活親人」生意。影片引發咗公眾熱議，唔少人批評為流量乜都做得出，有律師表示如果冇家屬同意會涉及侵權。

近日有中國網民發佈李玟、高以翔等已故藝人被AI「復活」影片，影片用逝世藝人嘅圖像搭配AI製成旁白，例如李玟嗰條片就講「我（李玟）知道你們可能會感到驚訝甚至有些不真實，但請相信我，這是一個充滿著愛和感激的時刻，因為我有機會透過這段影片與你們相聚」。

製作AI影片的博主「AI復活親人」聲稱係收到粉絲嘅請求先義務製作，仲話「這種不是模仿，只是表達對CoCo的愛。第一我是免費的，第二我是註明了AI生成」。有唔少網民詢問，製作逝者嘅影片點收費，相關討論更登上熱搜。

不過，有唔少內地網民提出批評，認為「既不尊重逝者，也不尊重逝者的家人」「為了流量不擇手段」「我個人覺得會更痛苦，看見「復活」了，又想想不是真的，再次陷入痛苦」「涉及到肖像問題，還是需要家屬同意的吧」「這不是復活是奪舍」。

對呢件事，四川鼎尺律師事務所胡磊律師表示，按照內地《民法典》嘅規定，博主擅自製作李玟形象同聲音嘅虛擬影片，侵犯咗逝者嘅肖像權同聲音權等。死者嘅姓名、肖像、名譽等受到侵害嘅，其配偶、子女、父母有權依法請求行為人承擔民事責任。

另外，泰和泰律師事務所楊青律師表示，無論是否以商業營利為目的，擅自使用他人肖像都有可能構成侵害肖像權。呢名「AI復活親人」博主將影片傳送到網絡平台，可以獲得點擊量嘅平台金錢獎勵，同時利用嗰條AI影片招徠生意，利用逝世藝人作宣傳，係一種以商業營利為目的。