根據中國網上消息，今年4月底有份題為《關於解散瀋陽交響樂團之決議》，顯示來自「瀋陽交響樂團理事會」嘅文件在網上熱傳。《決議》指出，瀋交在2023年嘅樂團年檢，遲遲未能獲上級主管部門審批並「批准、蓋印」，致樂團因年檢「逾期未檢」而喪失演出資格。並披露「瀋陽交響樂團」嘅銀行賬戶已被查封，現時樂團無法正常出糧及繼續運營。

另外，「瀋陽交響樂團理事會」在文件中指出，雖然樂團在舊年按時完成2023年度嘅「藝術惠民演出任務」，不過主管部門至今「一分錢都未撥付」，再加上上級至今未下達 2024年之演出任務，樂團已經走投無路。文件下方並有簽字欄位，有多位相信係時任理事之簽名在文件下方。

5月2號有網上消息稱，瀋陽交響樂團向瀋陽市「文化旅遊部」及「廣播電視局」提交「申請解散之請示」，並指樂團決定自2024年5月1號起，暫停一切工作並進行財務清算。另有網友引述消息指，「瀋交理事會」已發佈公告指，成立於2014年嘅瀋交樂團，終於因敵唔過財務壓力，在5月1號宣布解散樂團。

有網民見到消息指，瀋交樂團係一支典型「民營樂團」，啱先建團十年，原應企穩腳步，繼續向更高目標努力，無奈樂團只得一間民企財務支持，樂團經營及營運嘅費用相當高，財務方面支持有相當困難，因此而走上解散之路。中媒《紅星新聞》指，有團內知情人士表示，確實收到有關樂團解散之消息，不過具體情況暫不便透露。

有記者向瀋陽市「文旅部、廣電局」查證，對方稱「解散說法不實」，又稱「瀋陽不可冇交響樂團」。並透露，主管單位正同樂團負責人進行交流，雙方都希望瀋交今後能發展得更好，並繼續為瀋陽文化事業作貢獻。

有樂迷聞訊指，瀋陽樂迷嘅古典音樂啓蒙，多來自瀋交，並唏噓稱，交響樂團在中國「好難…」。有報導指，中國多個民營交響樂團，長期面臨「入不敷出」嘅「困難窘境」並面臨生死關頭，雖然多數樂團都嘗試「轉型」，不過在演出市場嘅競爭環境中，本地樂團長期落入「傳統」嘅侷限之中。

有樂評認為，過度頻繁嘅「樣板式、愛國主義制式」嘅任務演出，不只令中國多數表演缺乏開創性，在內容編排上，甚至吸引唔到新觀眾，同一時間，就樂迷、劇迷又不停流失緊。特別在近年「國家主旋律」嘅驅使之下，任何團隊嘅演出，都免不了要為「宣揚大中華文化」貢獻心力。不只文化內容被官方「限縮」，甚至要「主動唱好」博取上級歡心。

在中國對外經濟前景不明、大環境經濟氣氛不佳嘅時期，「藝術消費」自然首當其衝，成為大眾消費嘅「優先剔除對象」。加上「藝術消費」在中國社會長期被視為「次要再次要」嘅一環，包括「大型演出被取消、興趣藝術班縮減、高價樂器銷量大減」，各種現象都正在體現中國「消費降級」所帶來嘅連鎖效應。

根據網上資料，瀋陽交響樂團雖然由地方政府掛牌管理營運，不過係名副其實嘅「民辦非企業單位」。當初為咗要成立以城市為名嘅民營樂團，出資70%嘅贊助民企「華浩集團」同出資30%嘅國企「瀋陽演藝集團」，民官共同成立一間由文化局管理嘅「股份制樂團」。根據樂團副團長 翟煥民介紹，樂團「樂師、指揮、行政、管理」等人事費用多由「華浩集團」支付，一年大概需要900萬人民幣。

翟煥民曾經指出，瀋交每場惠民演出可收到政府資助3萬，年度「樂季、樂器設備」政府各別資助100萬，加上十場租費減免及多場租費優惠。不過，瀋交每年接受嘅資助及贊助，在中國一片職業樂團之中屬於「最低水平」。咁究竟中國一線大團一年要使幾多錢？根據「北京愛樂樂團」2023、2024年財報預算就可略知一二。

「北京愛樂樂團」2023嘅預算為2.9億，2024年再減為2.7億。在2023年嘅預算報告中指出，如果唔計其他事業編制規劃之2.6億經費，當年「演出預算」官方撥款3000萬，以較2022年大減5700萬，下降65%。原因之一係「基本建設項目支出」減少，其實就係「國家財政吃緊」。在國務院「過緊日子」嘅要求下，各級單位響應「大力壓減一般性支出」，北京愛樂為此大減一半以上「惠民演出、大型演出」，縮減開支響應中央政策。

根據「北京愛樂樂團」財報預算披露，一個80人上下嘅大型樂團，一年人事費用至少使費950至1000萬。另外，基本營運經費至少需要200至250萬。由此可見，瀋交作為一個民營樂團，排除人事費用加上營運費用，至多只可以勉強打平，惠民演出都要執行完畢後，經上級審批撥款先可以有錢收，同國家級樂團一年幾千萬、幾億經費嘅實質支持，在樂團經營層面，明顯非同一個水平級數。

另外，國家對公營樂團及民營樂團「待遇有別」，前者「先撥款、後執行」後者「先執行、後審批」，民營樂團確實需要承受更大營運風險。對此 翟煥民曾經指出，民營樂團需要「更懂政治、確立文化自信」，因此樂團曾「捐贈口罩俾公部門、推出一系列惠民票券折扣、組織樂團成員為國家烈士掃墓」，不過似乎都並冇因此而得到國家嘅「特別關照」，一樣逃唔過執笠嘅命運。

網上有樂迷問：瀋陽交響執笠，當地大型演出要交俾邊個單位執行？抖音博主「老王同學」對此做出評價，老王認為，答案自然就係交俾「瀋陽音樂院」嘅學生，用學生上堂時間排練，缺席就扣學分，不只國家唔使出錢、唔使出社保醫保，學生風光演出對家長都有交代，簡直就係雙贏。而且一批畢業之後，可以再招一批上來。國家永遠有用唔完嘅宣傳機器人，繼續免費為祖國演奏「黃河、長江」等偉大敘事紅歌。