內地最大食品飲料生產商「娃哈哈」創辦人宗慶後喺上月因病去世,佢嘅競爭對手「農夫山泉」創辦人鍾睒睒意外地陷入輿論風波。有網民指責鍾睒睒年輕時受宗慶後提攜,靠做娃哈哈代理賺錢,再另創品牌有「忘恩負義」之嫌。除此之外,有小粉紅指農夫山泉產品包裝有日本元素,指其「不愛國」,發動出征抵制。
據了解,鍾睒睒早年做過娃哈哈嘅代理商,藉此賺得第一桶金。之後佢另起爐灶,創農夫山泉,同娃哈哈成為競爭對手。宗慶後過世後,有網民翻出呢段舊事,批評鍾睒睒「忘恩負義」。
而且,有小粉紅拎娃哈哈同農夫山泉嘅產品比較,指娃哈哈嘅飲品包印住「祖國大好河山」、「中華」,而農夫山泉嘅包裝就出現「日本淺草寺五重塔」,藉此痛批農夫山泉包裝有日本元素、辱華,因為農夫山泉被出征,下架聲音不斷。
農夫山泉後來喺微信公眾號發文澄清,題為《鍾睒睒:我與宗老二三事》,話鍾睒睒第一桶金係嚟自布匹生意,又指「從未在娃哈哈領薪,更談不上因衝貨被開除」。文中又話,鍾睒睒同宗慶後已經握手言和,對對方企業家精神嘅尊敬從來都冇動搖過。文章又指「宗老生前痛恨網絡暴力。未曾想,借宗老離世,網絡上卻出現了大量對我個人及農夫山泉的詆毀,這絕非宗老所樂見」,話希望網民唔好畀個別自媒體或者一啲「大V」「帶節奏」。
受上述風波影響,農夫山泉官方旗艦店自 2 月 28 日連續 5 日銷量急跌,銷售額下跌逾九成,3 月 3 日單日銷售額只有 5 萬元人民幣。農夫山泉股價亦跟住下跌,一度「三連跌」,累計跌近 5%,市值由4993億港元,跌至4746億港元,縮水247億港元。