貴州六盤水市水城區女企業家馬藝珈伊，為當地政府承建易地扶貧搬遷工程、幼兒園、小學等10個政府項目後，持續追討工程款8年。2023年12月，在貴陽市高級人民法院聽證會召開當日，與律師反被公安以涉嫌尋釁滋事罪刑事拘留。

馬藝珈伊等人被指控在社交媒體發佈有關債務、訴訟嘅消息，並郵寄檢舉信俾某官員，內容涉及欠債唔還、非法解凍等問題。馬藝珈伊及2名律師上月被批准逮捕，9名律師助理取保候審，而家案件已轉送水城區檢察院審查起訴。

水城區政府拒絕支付款項俾馬藝珈伊嘅理由係，部分項目未經審計。然而，律師取得銀行資料發現，政府平台公司曾向兩家國有銀行貸款5.8億元，卻未用於借款用途，反而轉入多家關聯公司，涉嫌騙取貸款。

至於政府究竟欠馬藝珈伊嘅公司幾多錢，文件顯示，至少有4筆經訴訟確定嘅債務總額約為6955萬元，另有項目欠款約1億5248萬元，換言之，水城區政府共欠約2.2億元。當地政府一份報告中亦確認有一筆9000多萬元欠款。馬藝珈伊等人被捕前，水城區政府一度提出以1200萬元化解所有債務，但遭到拒絕。水城區政府對於此事暫未有回應。

由於遲遲攞唔返欠款，馬藝珈伊賣車賣樓，周圍借錢出糧比工人，但仍然欠材料供應商一大筆數。佢曾透露，2020年2月開始，機械商、材料商等開始向佢追債，更試過被軟禁及遭到各種折磨，2022年8月被毆打，「全身軟組織挫傷、左肋骨骨折，右腿膝關節至今不能正常行走」。

中國獨立記者高瑜喺社交平台發文稱，貴陽六盤水市水城區政府挪用中央專項扶貧資金，同時涉嫌騙取銀行貸款，8年拖欠企業2.2億政府項目工程款唔還，反而指使當地公安抓捕企業法人同執行債務嘅律師，公然製造冤假錯案，係明目張胆破壞經濟發展，破壞法治嘅罪行。高瑜呼籲，如果唔依法懲惡，省委同中央政府執法機關將承擔包庇約容嘅責任。