金管局喺立法會財經事務委員會會議上披露，若唔計長期組合嘅估值變動，外匯基金舊年首季錄得投資收入543億元，連續兩季錄得投資淨收益。雖然首季錄得逾500億元投資收益，但同舊年第一季嘅1,080億元同埋舊年第四季嘅1,201億元相比，明顯有差距。

舊年首季投資收入543億元，按年減少近五成，按季亦跌五成四。主要資產類別當中，主要係歐美股票有升幅，其他股票投資賺363億元。而受惠唔同國家債券收益率持續維持喺高水平，利息收入高企，債券賺251億元。香港股票蝕23億元，連續四個季度錄得虧損，外匯亦錄得48億元虧損。外匯基金首季支付予財政儲備款項有39億元。

有網民諷刺話：「叫人強積金買港股 自己就幾乎all in美股… 」、「沒有歐美，你臭港什麼都不是」、「要不是美國，外匯基金完了」、「叫人衝，自己鬆」。

不過，官方咁係有自己嘅解釋方法。金管局總裁余偉文表示，美國利率走勢不明朗，高息環境將會持續一段時間。但係中國內地經濟回升，本港經濟繼續復甦，前景面對地緣政治局勢等唔確定性因素。不過佢都話本港金融體系抗震力強，資本同流動性緩衡相當充裕，市場運作維持暢順。

佢又講，市場對美國減息預期調整至出年最多減息兩次，但何時開始減息仍不確定。隨著減息預期調整，導致美元轉強，影響唔少亞洲貨幣，印尼、馬來西亞、南韓貨幣均有轉弱。美息走勢唔確定性，亦令亞太區債券基金趨勢流入較反覆。亞洲區一般企業減少咗發債，尤其美元債，過去2至3個月跌幅頗多，美元債佔亞洲發債份額亦一直下跌。亞太區企業發債息差下跌並平穩，反映市場對亞洲區經濟較看好。

余偉文稱，香港經濟溫和增長，首季出口按年增長12%，貨物出口繼續復甦，相信同環球經濟轉趨活動，同埋電子消費品改善有關。旅遊業方面，入境旅客僅恢復至疫情前約60%，但出境旅客恢復至疫情前，加上旅客消費模式改變，零售、餐飲業仍存在一定挑戰，希望隨更多內地城市開放，會有更多旅客來港。

樓市方面，余偉文表示，近期樓市交投明顯增加，2月份樓市交投宗數逾2300宗，3月份已升至3900宗，4月更達逾8500宗，但基於美國減息步伐或會延後，港息好可能喺高水平維持一段時間，市民若置業、進行按揭同借貸，要注意利息風險。《I》