尋日「香港隊VS國際邁阿密CF表演賽」，阿根廷球王美斯全程齋坐無落場，同4萬人一齊睇波，畀球迷嘘爆嗌回水。今日文體旅局局長楊潤雄今午（5日）召開記者會解畫，佢表示政府嘅資助條款明確指出，除非有安全或健康理由，美斯要上場至少45分鐘。

楊潤雄話主辦商Tatler喺比賽前仍然確認美斯會參與，但到下半場時美斯未上陣，政府提出要求佢哋立即聯絡國際邁阿密，主辦機構當時先表示，美斯因傷未能出場。政府當場要求安排美斯出場，到完場前10分鐘，主辦方再次確定美斯未能出場。

楊潤雄表示，政府當時已經提出一連串嘅補救措施，包括俾美斯親自交代或者領取獎盃，但最終都唔能夠達成，美斯冇接受香港主辦方嘅紀念牌，影大合照時仲特登企到去最後排。楊潤雄指，主辦方冇詳細解釋美斯受傷情況，事前亦唔知道其受傷程度是咪容許落場，又指會繼續努力推動盛事落戶香港，汲取今次經驗，聯同大型體育活動事務委員會進一步改善工作。

對於美斯未能上場，楊潤雄強調主辦方Tatler有責任向公眾交代，同時都表示政府係整個過程入面一直都投入唔少心血，要求主辦方盡快交代事件。佢又指又指政府1,600萬元贊助仲未付款，未來會同主辦方Tatler討論後，再決定係咪會付款。

對於球迷有冇可能追討門票費用賠償，大律師陸偉雄表示，雖然購票時通常有免責條款，但香港有《管制免責條款條例》可以凌駕購票條款，如果發現存在唔公平、唔合理嘅情況，球迷就可以向法庭申訴。

立法會議員江玉歡則表示，球迷如果若要追討賠償並唔係易事，因為球隊並非無人落場踢波，而係有同港隊完成賽事。佢舉例指，早前C朗拿度原定同艾納斯造訪深圳上演兩場表演賽，由於賽事係直接取消，所以球迷可獲得賠償。而美斯無落場事件，就係另一種情況，只係有個別球員無落場參與。她認為，身體不適對運動員嚟講係普遍嘅事，認為追討有困難。

有外媒報導指，國際邁阿密接下來嘅比賽，喺東京國立競技場同神戶勝利船友誼賽可能取消，因為提供網上直播賽事嘅平台Apple TV+已經抽起直播日本嘅賽事。顯示下場比賽係2月16日對戰阿根廷嘅紐維爾舊生（Newell’s Old Boys），比賽地點為國際邁亞密喺美國主場。

不過雙方球會至今仍在網頁上顯示賽事如期舉行。而國際邁阿密今早喺社交平台X（前推特）嘅官方帳號發文，表示：「Next Up: Japan ️」（下一站：日本）。