國際巨星泰勒絲（Taylor Swift）世界巡迴演唱會只選擇咗日本同新加坡兩地，無揀到香港，令香港樂迷大感失望。同時更引起咗立法會議員嘅關注，其中新民黨主席葉劉淑儀喺立法會上質詢政府如何檢討，點樣吸引國際歌星。

文化體育及旅遊局局長楊潤雄回覆表示，雖然樂見更多國際知名歌手來港表演，但都要交返畀市場決定。佢提到，表示大部分演唱會係私人企業舉辦，政府唔需要參與。佢強調，主辦方考慮嘅因素包括歌手日程、財政可行性、目標觀眾數量，同埋場地配套。

楊潤雄又引述統計數據指出，2023年香港每月平均有兩場國際知名歌星嘅大型演唱會，觀眾人數超過萬人。佢強調香港有「背靠祖國，聯通世界」嘅地理優勢，加上大灣區嘅觀眾群，都為香港帶來不少表演機會。

但葉劉對於楊潤雄嘅答覆感到不滿，直斥得到一個「非常官僚嘅答案」，佢呼籲政府要更主動，甚至提出邀請Beyoncé或者內地頂流歌手來港演出。但楊表示政府將與相關機構合作討論吸引外國歌手來港嘅方案，強調「個別邊個嚟，邊個唔嚟，交返畀市場決定，好難話政府主動話，一定要攞到邊個過嚟，先叫做成功或失敗」。

然而，多名議員要求政府要更積極「落水」去爭取演唱會。批發及零售界議員邵家輝指出，韓國女團BLACKPINK喺外國開演唱會後，其他國家甚至安排高層頒獎以示感謝，建議政府要更積極咁協助。楊潤雄稱可以考慮多種協助方法，包括頒獎，但又話唔應該逢人就頒獎，「逢邊個過嚟就頒個獎，咁反而覺得我哋個獎，又唔係好興馨香」。

翻查資料，BLACKPINK喺舊年11月，受邀赴白金漢宮出席英國皇室國宴，更獲頒MBE 榮譽勳章。英王頒MBE榮譽勳章BLACKPINK當然樂於出席，但如果香港頒大紫荊勲章，唔知有無人會畀面呢？

商界議員廖長江提出部分場地設施唔夠先進，唔能滿足國際巨星嘅高規格要求。對此，楊潤雄表示唔同意由政府預設音響或舞台設備，認為每個演唱會都有唔同要求，政府場地提供嘅主要係空間。

另外，當局早前提出考慮設立「流行文化館」，楊潤雄表示，正就流行文化館選址同面積作長遠規劃，當局正與發展局、西九文化區管理局等相關機構商討同研究，期望物色最理想嘅選址。 

楊潤雄表示，當局正研究將流行文化館發展為本地嘅文化地標及景點，計劃短期喺香港文化博物館，預留特定展廳舉辦流行文化相關展覽同推廣活動，以及擴大合作網絡同豐富有關流行文化嘅收藏。