多名警員喺深水埗執行反罪惡行動期間，涉嫌毀壞露宿者嘅家當，甚至攻擊同誣衊露宿者藏毒。有警員甚至試圖遮擋閉路電視鏡頭，但行為依然被現場嘅閉路電視拍到。涉案嘅6名男警同2名女警，因為妨礙司法公正、公職人員行為失當等十項罪名接受審訊，案件今日喺區域法院續審。

涉案嘅8名被告分別係郭展昇（31歲）、韓廷光（29歲）、梁飛鵬（29歲）、龐雋詩（29歲）、林華嘉（44歲）、莫志成（25歲）、尹栢詩（25歲）同陳守業（27歲）。佢哋全部共被控10項罪名，包括妨礙司法公正、公職人員行為失當、對他人身體加以嚴重傷害同刑事毀壞。

露宿者阮文山今日續作供，用越南話講述案發情況。佢話自己喺2020年2月4日遭到襲擊之後，警員帶佢返警署。阮喺警署房間裡面接受查問，但因為太痛，無法回答問題，當日都無見過警署值日官。被問到佢喺警署期間有冇將遇襲事情話畀其他人聽，阮話喺接受查問時，有警員「阻住講野」，直到喺救護車上先講畀救護員知。

阮之後俾人送去明愛醫院，對醫生講佢之前遭到警員襲擊。阮之後獲安排照X光，報告顯示佢嘅胸骨受傷，有骨裂，建議佢留院一晚。

另外，佢亦講述2月24日下晝發生嘅事，阮話當時有大約6至7名警員去到通州街公園涼亭，當中有一名女子。其中一名男子走上前問阮「痛唔痛」。阮認出對方係之前打佢嘅攜槍警員，佢話「你都打我好痛」。嗰位警員又問阮有冇怪佢，阮就答「冇嘢」。

阮續指，之後有2至3名男子開始「揼爛」佢嘅物品，包括魚罐頭、米、鼓油、鹽等，都被掉喺地上，椅子等嘅家具都被打爛，無辦法再使用。期間，嗰位攻擊佢嘅警員叫佢「企定定睇佢哋做嘢」。之後警員又帶阮去另一名越南露宿者「阿十」嘅帳幕前，並砸爛佢嘅衣物同罐頭。

控方最後問阮，警員毀壞佢哋嘅物品之前，有冇問過佢或者其他人呢啲物品屬於邊個，阮話冇。阮又同意，有警員喺2020年5月28日聯絡佢進行認人手續，佢當時都應承喺律師陪同下出席。到嗰日，有警員去通州街搵佢，但因為佢律師無時間，最後冇完成認人手續。

控方播放嗰段涉案閉路電視片段，顯示阮被人打。佢睇嗰段片嘅時候情緒激動，不斷咳嗽，話諗起當日被打嘅情景。