香港跨年夜，有數以萬計嘅大陸客寧願露宿街頭通宵趕返去，都唔願意租酒店住一晚，呢個現象反映出喺「大灣區」融合之下，大陸人訪港嘅消費模式出現咗變化，留港消費嘅人數同金額都大減。事實上，自從去年初香港政府推出遊客100港元消費券之後，大陸就瘋傳「0元遊」攻略，即係即日來回「窮遊」香港，喺坊間被形容為「負消費」現象。本台保守估計，一連三日嘅元旦假期，大陸訪客日均出境多過入境逾1.2萬人，呢班即日客喺對本地零售「0貢獻」嘅情況下，日均已經白白耗費公帑逾120萬港元。

根據資料，香港政府去年三月起推出咗100萬份價值100元嘅「香港有禮」遊客旅遊消費券，再喺11月加推咗100萬份「香港夜饗樂」嘅100元餐飲消費券。大陸社交平台「小紅書」同微博就流行起即日來回「窮遊」或「0元遊」香港嘅熱潮，而「香港羊毛」、「香港薅羊毛」等成為熱搜關鍵字，意指教路點樣賺盡「著數」。

最近嘅攻略教路，大陸客黎到香港可以半價買到港鐵全日通，然後去好多免費入場嘅旅遊熱點，仲可以攞到商場提供嘅免費試用裝優惠，晚上六點之後就用「香港夜饗樂」100元餐飲消費券去食飯，全程差不多「0消費」玩足一日。

有啲大陸人更加精明，利用喺除夕截止嘅「香港有禮」消費券，免費搭機場快綫來香港，甚至教路點樣喺機場「留宿」，省埋過夜費，又或者兌換100港元嘅商戶現金券，過一個輕鬆嘅跨年夜。

根據香港入境處數字，由除夕開始一連三日嘅元旦假期，有大約34.6萬人次大陸訪客入境，但有約38.3萬人次出境。日均嘅出入境人數負數過1.2萬人次，假設呢啲就係唔過夜嘅大陸訪客，就表示政府每日白白耗費咗逾120萬港元。

至於「香港有禮」消費券嘅100萬份早就派完，涉及嘅開支有1億。根據最新旅發局數字，去年一至十一月，大陸訪港人次共有2382萬，當中唔過夜嘅佔咗逾一半，大約有1270萬人次。酒店入住率未有明顯提升，只係維持喺八成水平。

至於旅客嘅消費狀況，由於香港政府自2020年至2022年冇發布相關數字，只能夠參考2019年嘅數據。當時，唔過夜嘅大陸訪客人均消費約2200港元，過夜嘅大陸旅客則達到5990港元。所以，當唔過夜嘅人數比例增加嗰陣，對香港旅遊經濟嘅影響會更加大。

旅遊促進會嘅總幹事崔定邦向親中港媒《星島日報》表示，過夜客減少嘅主要原因係「港深一體化」，而家坐廣深港高鐵返福田只需12分鐘，所以佢問點解深圳居民要喺香港過夜。不過，佢都認為即使係窮遊，都好過無，起碼旅客記得香港。