台灣總統大選日近，中國頻頻出手意圖影響選舉結果，繼早前稱台關稅壁壘，中止ECFA石化類十二項產品關稅減讓，轉頭又宣布石斑魚恢復輸入，一手大棒一手糖果態度明顯。而今日（27日）國家主席習近平喺北京紀念毛澤東冥誕130周年活動中，重申對台灣強硬立場，聲明堅決阻止任何形式嘅台獨行動。

《新華社》報道指出，習近平喺「紀念毛澤東同志誕辰130週年座談會」中強調，「實現祖國完全統一」係「大勢所趨、大義所在、民心所向，祖國必須統一，也必然統一」。又指要堅持貫徹「新時代黨解決台灣問題的總體方略」，堅持「一個中國」原則同「九二共識」，深化兩岸各領域融合發展，推動兩岸關係和平發展，同時要「堅決防止任何人以任何方式把台灣從中國分裂出去」。

《路透社》報導指出，雖然習近平未明確提及使用武力對台灣，但中國從未諾放棄武力攻台。習近平嘅言論喺台灣即將舉行選舉嘅敏感時刻，無疑為兩岸增加緊張氛圍。報道又指，中國當局多次譴責民進黨總統候選人賴清德係「危險的」台獨分裂份子，同時拒絕賴清德提出嘅兩岸對話主張。

新加坡國立大學嘅政治學者莊嘉穎喺接受《美國之音》採訪時分析認為，中國當局喺呢次台灣大選中，似乎為「反對民進黨的強力參選者」拉票。佢指出，如果民進黨不單只贏得總統大選，仲有喺立法院保持多數席位，將會係北京最唔想睇到嘅結果。

中國喺過去幾週採取咗一系列脅迫性措施，包括軍事、政治同經濟壓力，試圖干預台灣嘅選舉。呢啲措施包括派遣軍機、釋放高空氣球至台灣附近空域，以及中止對台灣石化產品嘅進口關稅優惠。

台灣國防部報告顯示，解放軍近期喺台灣海峽周邊嘅活動頻繁，包括飛機、軍艦嘅活動以及空飄氣球嘅侵入。台灣軍方表示，將按照往例喺選舉期間加強戒備，以確保選舉嘅順利進行。

另外，中國介選亦有疑似假消息攻勢，今日國務院台灣事務辦公室上午舉行例行記者會，香港親中媒體《中國評論通訊社》詢問，「有傳言稱民進黨當局計劃以大陸呼吸道疾病嚴重為由，禁止大陸台胞返台投票」。國台辦發言人陳斌華表示，大陸台胞返台投票係佢哋嘅基本權利。又警告，如果民進黨當局真係借題發揮、輕舉妄動，剝奪大陸台胞嘅投票權，將會暴露其專制同非民主嘅本質，被廣大台灣同胞所反對。不過網上並無台灣當局禁止中國台商回台嘅相關報道。

而陳斌華咁啱又有數據喺手，話根據國家衛生健康委最新數據，12月22日，全國二級以上醫療機構門急診呼吸道疾病總診療量，較上周同期下降8.2%，較高峰期下降30.02%，總體呈下降趨勢。一唱一和作故仔味道極濃。