根據3名現任以及前任美國政府官員透露，喺上個月美國三藩市APEC期間舉行嘅習拜會，中方表明會實現統一台灣，但未有提出具體時間表。除此之外，中方事前仲向美方提出要求，希望拜登會後對外宣布支持兩岸統一，並表明反台獨。不過，美國白宮就拒絕中方嘅要求。

美國國家廣播公司新聞網（NBC News）引述三位官員嘅話報導，中國國家主席習近平喺有十幾名中美官員參與嘅會議上，當面同美國總統拜登表明，北京會統一台灣，不過習近平重申，中國傾向於通過和平手段實現統一，而唔係動武。

習近平過去曾多次提出，如有需要會不排除使用武統台灣。呢項立場一直係美國政府所關注，美國方面致力於避免同中國出現軍事衝突。會談中，習近平表示，有關佢計劃喺2025年或2027年攻台嘅外界預測係錯誤嘅，表示中方並無設立具體時間表。白宮國家安全會議（National Security Council）發言人拒絕評論上述嘅講法。

根據NBC News嘅報導，呢次習拜會揭露咗一啲之前未曾公開嘅細節。即使習近平嘅私下警告同佢之前對統一台灣嘅公開言論大致相同，但鑒於當前中國對台灣嘅行動日益強硬，佢嘅言論仍然引起美國官員嘅高度關注。因為隨著美國逐漸喪失喺第一島鏈嘅軍事優勢，中國已經步步進逼台灣，而且明年1月台灣就舉行總統大選。

美國官員表示，習近平喺會晤期間，亦都對台灣總統選舉嘅候選人表示關切；習近平又提到美國對台灣嘅影響。當拜登提出要求中國尊重台灣選舉進程時，習近平回應稱，雖然和平固然係好，但中國最終必須朝兩岸嘅終局方案前進。會晤後，拜登重申美國堅守「一個中國」政策，並表示唔會改變呢個立場。

會後，中國外交部部長助理華春瑩喺社交平台X發文表示，「台灣問題仍然是中美關係中最重要、最敏感的問題」，又指美國應該「支持中國和平統一、停止軍援台灣」，仲話「中國必定會實現統一，這是不可阻擋的」。

習近平喺舊年嘅中共二十大曾表示，「堅決反對台獨分裂行徑，堅決反對外部勢力干涉，牢牢把握兩岸關係主導權和主動權」，又話中國會以最大誠意同努力爭取和平統一，但「絕不承諾放棄使用武力，保留採取一切必要措施的選項」。此外，習近平設定嘅2035年經濟目標為達到「中等已開發國家」水平，NBC引述專家質疑，中國可能會因經濟發展需要，而避免對台灣採取軍事行動。