今日9月就傳出中國政府機構同國企都禁用iPhone。彭博社報導指，內地各地更多部門同國企要求員工停止攜帶蘋果iPhone同其他外國設備上班。報道引述知情人士透，過去一兩個月中至少有8個省份嘅多間國有企業同政府部門，下令要員工使用國產品牌如華為、OPPO等，形容係象徵中國加速擺脫對美國技術嘅依賴。

彭博今年9月曾報導，內地當局將對外國設備嘅禁令，決定擴大到最敏感部門以外，包括更多政府機構，甚至國企。雖然近年來中國製軟件同硬件逐漸取代美國產品，但呢項禁令可能會迅速而直接打擊蘋果嘅市場份額。知情人士指，本月內地低線城市嘅更小型公司同機構都發布咗口頭通知，表明更廣泛嘅禁令正喺展開。據悉至少有8個省份發佈禁令，從浙江、廣東、江蘇同安徽，到山西、山東、遼寧同河北。

中央政府曾反駁有關限制iPhone嘅報導，外交部發言人毛寧喺舊年9月份嘅新聞發布會上講，中國冇出台禁止購買同使用蘋果等外國品牌手機嘅法律法規同政策文件。

報導表示，目前尚未清楚究竟有幾多政府機構發佈相關禁令，亦唔清楚呢啲指令嘅普及程度。而唔同機構喺執行指令嘅程度上可能唔同，有啲禁止喺工作場所使用蘋果設備，有啲則完全禁止使用外國設備。

除咗蘋果被點名限制，同樣屬於外資企業、喺中國手機市場有好高市佔率嘅南韓三星電子，對於佢哋出年可能面臨嘅狀況，都感到憂慮，害怕就此失去呢個重要嘅龐大市場。

回顧舊年9月第一次傳出禁用限制時，蘋果一度遭遇股價大跌，單日下挫3.58%、等於市值蒸發約1061.69億美元。

另一邊廂，英國金融時報今日報導，出於安全考慮，英國國家電網已經開始移除由一家中國公司提供嘅組件。被禁嘅公司為中國國電南瑞科技（Nari Technology）。

金融時報引述兩名消息人士指出，喺今年4月呢作出呢項決定，國家電網仲向英國情報機構政府通訊總部下屬嘅國家網路安全中心作出咨詢。

報導指中國國電南瑞嘅英國分公司NR Electric UK一名員工表示，公司已不獲批准進入英國國家電網，而且國家電網亦無講明終止合約嘅原因。

報道又引述消息人士指，英國電網作出相關決定同NR Electric UK提供嘅一個組件有關。呢個組件負責電網嘅控制同平衡，以減少停電嘅風險。

英國國家電網以「機密合約事項」為由拒絕就此事置評，只表示「非常重視基礎設施嘅安全，同採取有效嘅管控措施嚟保護我哋嘅員工同關鍵資產，以確保我哋能夠繼續可靠、安全地傳輸電力」。

中國駐倫敦大使館表示，唔知道有關公司嘅決定，但表示中方原則及一貫立場係反對以安全為藉口，推動脫鉤及切斷供應鏈，指中英務實合作係互利共贏，兩國應共同努力創造有利環境。