評級機構穆迪將香港嘅信用評級，由「穩定」降級到「負面」，反映香港同內地緊密聯繫。政務司司長陳國基今日（7日）回應評級屬無理抹黑，並指以美國為首嘅西方國家，意圖透過香港壓制中國發展。

報道指，穆迪調低香港評級展望，理由係因為香港同內地各層面都緊密連繫。由於內地經濟增長放緩、金融風險擴大，對香港嘅信用狀況造成影響。穆迪亦提到，由於政治同制度聯繫嘅加強，例如香港實施《國家安全法》同埋「完善」咗嘅選舉制度，香港嘅政治、體制同經濟決策嘅自主權有可能逐步受到影響。

政務司司長陳國基今日喺一個電台節目批評外國評級機構抹黑香港。陳國基佢表示唔同意穆迪所指香港經濟受中國經濟增長減弱影響，認為外國評級一直抹黑香港，質疑穆迪理據：「話內地經濟有問題降級，點解降埋香港呢？係無乜道理。」佢話以美國為首嘅機構一直搵機會抹黑香港同內地，企圖透過香港壓制國家發展。

佢又話，內地經濟影響好多國家，反問為何不同時下調其他國家嘅評級。佢話環球經濟「東升西降」嘅格局好明顯，「國家一路好，香港唔會差得去邊。」

佢亦唔同意跨國企業對香港無信心呢個講法，話政府透過招商有30間跨國企業落戶香港，搶人才又有超過18萬人才申請來港，證明香港有吸引力。佢又強調要喺國家安全受保障之後，先可以發展經濟同改善民生。

對於陳國基嘅抹黑論，網民就唔係好同意，表示「人哋支持你一國呀！又唔啱？你想點嗻！」「恆指唔識講大話架，點抹黑」，亦有人認為「穆迪做法太過卑劣，佢唔應該為香港評級，因為香港已經係中國嘅一部份，中國嘅評級就係香港嘅評級，如果有人唔贊成，認為香港嘅評級唔同中國嘅評級佢就係分裂緊中國，搞分化同軟對抗」

對於其他媒體對於穆迪下調評級嘅分析，明報社評話，香港內外環境近年出現結構變化，必須提升競爭力，而香港同大陸經濟日益緊密，大陸增長放緩，香港必受牽連。而西方對香港觀感轉差，穆迪下調香港評級展望，部分理據反映咗相關情況。因此，港府要「說好香港故事」，畀國際社會睇到香港多元開放未變。

信報社評就話，穆迪喺極短時間內將中國同港澳嘅信用評級展望下調至「負面」，帶出嘅訊息係國際信用評級機構已經將中港澳視為「三位一體」，關係密不可分。社評又指穆迪嘅邏輯大概係「中國好、香港好、澳門好」，咁而家中國唔好，港澳同樣都唔好，中港澳構成真正核心意義嘅「命運共同體」。