近年使用Deepfake技術「換臉」嘅詐騙日新月異。台北市聯合醫院300幾個醫生都接到勒索電郵，電郵內容係一張男女喺酒店房間擁抱嘅相，但男方臉部被換成醫生嘅照片，不過由於畫面製作粗糙，並冇醫生上當。

據悉由於台北市聯合醫院為咗方便通訊同識別醫生，會將醫生嘅照片、科別、同埋院方專屬嘅個人電子郵箱資料放喺名冊上，同時上載到網上方便公眾查閱。

台北警方喺今年7月收到醫院報案，指出由6月起有醫生陸續收到恐嚇勒索郵件。信件附上一張男女喺酒店房間擁抱嘅畫面，但男方臉部疑似用人工智能嘅深偽（Deepfake）換臉技術換成醫生嘅照片。

勒索信內容為「X先生，有人委託我調查你，收到郵件立即聯絡我低調處理，否則你的影片將會被公開」，或「現有你精彩的東西，在我手，如有想法要解決，速來電，你的態度決定我的操作」等。幸未有人上當。院方內部調查發現共有300多名醫生收到類似信件，統一報案。

台灣警方解釋，呢種「亂槍打鳥式」嘅詐騙手法，犯罪分子從中國同香港嘅IP地址發送恐嚇郵件，附上一張用AI技術合成嘅照片，顯示醫生同一名裸女喺床上。而嗰個「攬女」畫面曾被用於恐嚇官員案件，只係呢次用喺台灣醫生度。如果受害人回覆，對方就會傳更詳細嘅影片過嚟。刑警又查出所用嘅電子郵件註冊喺香港，另有聯絡LINE ID嘅IP地址顯示喺中國。警方持續同刑事局合作，追查信件來源同涉案人員。

對於事件，有網民指「總之網路上就是不要隨便公開個人照以免變成受害對象」「簡體字， 一看就是詐騙」「眼見不為憑時代」，不過亦有人表示「學到了。我被捉到就堅持説是AI變臉的」「感謝AI，以後都是AI換臉的，這樣全部可以一概否認」。

喺中國，近期已發生咗好多次利用AI換臉詐騙案件，最近，山東刑警大隊偵破咗一宗AI換臉詐騙案，受害人黃某畀一名自稱係佢「表哥」嘅人，假借幫手轉帳嘅藉口，呃咗30萬元人民幣。黃某表示，曾經透過視像通話確認係「表哥」，但10秒後電話掛線。警方拉咗7名嫌犯，案件在審理階段當中。

刑警表示，AI換臉換聲詐騙手法目前已好常見，對方通常會話有急事，換臉影片通常只能持續10多秒鐘，若碰到類似形況可透過延長通話時間、多次提問等對方多講嘢，從而露出破綻。