一名就讀中國廣東省深圳日本人學校嘅男童，今（18日）上午遭一名男子攻擊受傷。短短一年之內，中國連續發生多單攻擊外國人嘅事件，引起國際社會對中國仇外情緒嘅擔憂。

日本內閣官房副長官森屋宏今日表示，一名喺中國廣東省深圳就讀日本人學校嘅日本男童，今朝遭到一名男子襲擊受傷，現時已經送院治療。

日本TBS電視台報道，森屋宏喺今日嘅例行記者會上表示：「日本駐當地總領事館基於保護僑民嘅立場，已經向中國當局提出要求，實施防止類似事件再度發生嘅措施，並分享事件詳情。」

共同社嘅報道指，疑似作案嘅男子已被深圳當局拘留。日本政府消息人士透露，男童遇襲時正喺上學途中。讀賣新聞指出，深圳集中了大量中國科技企業，當中亦有唔少日本公司進駐。

其實，喺今年6月，中國曾經發生過日本學童遇襲事件。一對日本母子6月24日喺江蘇省蘇州市被一名中國男子持刀襲擊，導致三人受傷，其中一名係校車女導護，最後因傷重不治。

《香港01》報道，近年嚟，中日關係因為領土爭端同二戰歷史問題而時有動盪。自從日本去年8月開始啟動福島核處理水排放計劃之後，中國民間對日本嘅不滿情緒高漲。蘇州日本人學校、山東青島日本人學校都曾經遭到人掟石頭、雞蛋。

喺中國互聯網上，早喺去年初，就開始流傳關於日本人學校嘅種種謠言。呢啲謠言多數係由一啲內地自媒體帳號炒作，當中唔少獲得上萬甚至10萬+嘅瀏覽量或者點贊量。內容最常見嘅包括：中國有35所日本人學校，佔全球其他國家日本人學校嘅40%；而呢啲喺華日本人學校係「獨立王國」，同外界封閉隔絕，只招收日本學生，唔收內地學生，唔受中國政府管理，甚至貼有「禁止中國人靠近」嘅標語。

針對呢部分謠言，已經有人出面駁斥。好似南京大學新聞傳播學院嘅「NJU核真錄」，作為從事「事實核查」嘅教學實驗自媒體，喺今年2月引述日本文部科學省嘅名單指出，截至2023年4月15日，日本喺中國共建立咗15所外籍學校，佔全球日本人學校嘅15.95%。日本人學校只招收日本學生，係因為中國國家教委（即教育部前身）喺1995年4月發布嘅《關於開辦外籍人員子女學校的暫行管理辦法》規定，呢類學校不得招收境內中國公民嘅子女入學。呢啲學生冇中國學籍，無法參加中國高考。

至於話日本人學校係「獨立王國」嘅謠言，實際上中國政府會對日本人學校嘅活動進行監管。大部分喺中國嘅日本人學校官網都有公開學校活動嘅資訊。

對於「日本人學校禁止中國人進入」呢類言論，網民紛紛指出，學校並非禁止中國人進入，而係禁止外人隨便進入。其實，就算係中國普通中小學，為咗安全考慮，都禁止外來人員隨意進入校園。《I》