從「華為」創辦人任正非、比亞迪創辦人王傳福、寧德時代創辦人曾毓群、小米創辦人雷軍，一直到機器人龍頭「宇樹科技」創始人王興興，甚至連據傳被「冷凍」嘅阿里巴巴創辦人馬雲都集體亮相！點解？原來係因為中國國家主席習近平召見中國民營企業各大巨頭喺北京開會，目的就係想提振民企信心，同時挽救處於低迷嘅中國經濟。

根據台灣中央社報道，習近平今（17日）喺北京出席民營企業座談會。正值美中爆發科技戰、中國人工智慧（AI）發展又大受關注之際，加上中國急需民企提振信心解救經濟，所以外界尤其關心習近平今次講乜。

中國官媒新華社指出，習近平今早喺北京參加民營企業座談會。佢在聽取多位民企負責人代表發言後，發表「重要講話」。中國國務院總理李強、副總理丁薛祥都有到場，政治局常委王滬寧主持會議，但目前佢哋尚未公開習近平講話具體內容。

經央視新聞畫面可見出席者尚包括寧德時代董事長曾毓群、比亞迪董事長王傳福、華為創辦人任正非、強勢崛起AI新星DeepSeek創辦人梁文鋒、美團創辦人王興、奇虎360聯合創始人齊向東等，陣容不可不謂鼎盛。

路透社稍早引述消息人士透露，習近平喺會上大概會鼓勵民企面對美中科技戰時，於國內外擴展生意版圖。一批來自科技界企業家都有參加，包括網絡巨頭阿里巴巴創始人馬雲、騰訊創始人馬化騰、小米集團創始人雷軍，連智能機器人公司「宇樹科技」創始人王興興都到場，該公司創製各類四足機器人，今年喺央視春晚上都引起唔少轟動。

唔少觀察認為，此時大舉「召見」民營企業巨頭，正是習近平想藉住商業領袖力挽中國不振經濟，亦希望消除民企對政府干預、打壓嘅疑慮。市場更推測，習近平大機會喺會中鼓勵各大企業加強國內外業務拓展，支援中國應對經濟疲軟同美國「科技圍堵」。值得留意，過往傳出馬雲被政府打壓一度人間蒸發，今次都親自現身，顯示北京想重新「安撫」民企大佬，希望復蘇經濟。

不過，據「吳曉波頻道」等內地媒體先前分析，唔少企業家都並非靠政府重大科技項目撥款發圍，而真正創新往往需要容許自發性「亂中求生」。紅星新聞等媒體亦提及，呢類「杭州六小龍」或像美團、抖音背後嘅「失控式」成功，並唔一定能被其他城市甚至全國輕易複製。

另外，新華社今次大篇幅強調習近平從2003年在浙江開始提出「數字」戰略、推動創新。不過究竟今次一場座談會是否真能挽救民企、帶動經濟，市場依舊存疑。《I》