昨（6日）晚香港大球場舉行世界盃外圍賽，喺賽前奏唱國歌期間，有2名球迷未有站立，另有1名球迷「擰轉面」，就被在場身穿黑色背心嘅警員以違反《國歌條例》拘捕。早前6月4日，亦有一名男子稱僅攜帶《習近平談治國理政》書本，就被警方截查後帶上警車。有大陸網民感歎如今香港「比大6還要6」。

據《獨立媒體》報道，港足昨日晚上喺香港大球場主場對陣伊朗。比賽開始前嘅奏唱國歌環節，當奏唱國歌《義勇軍進行曲》嘅時候，多名喺場警員向球迷拍攝。之後，警員即場翻睇攝錄機嘅影片，並喺上半場進行期間帶走現場三名球迷。

今日早上，警方表示，三名被捕人士已獲准保釋候查，須於七月上旬向警方報到。被捕嘅三人分別係兩男一女，年齡介乎18至31歲。警方指出，三人涉嫌侮辱國歌，案件已交由灣仔警區重案組第二隊接手調查。

《國歌條例》喺2020年6月12日刊憲生效，法律條文內容包括禁止以歪曲貶損方式奏唱國歌，或以其他方式侮辱國歌。根據《國歌條例》，侮辱國歌一經定罪，最高罰款5萬元及監禁3年。

喺2022年9月4日，即港隊喺香港大球場對陣緬甸嘅賽事，呢場係《國歌條例》立法後嘅首場港隊公開比賽，警方自當時已安排便衣警員，喺奏唱國歌期間向觀眾席進行拍攝，部分更係反黑組。

另一邊廂，喺當局口中「敏感日子」嘅6月4日，維園足球場被建制派團體佔據舉行第二屆同鄉社團家鄉市集嘉年華，大批警察喺維園一帶駐守。喺當日下午約6時許，一名穿上印有哲古華拉肖像黑色T裇、白色褲嘅男子，被多名家鄉市集嘉年華嘅保安帶走。

保安將男子包圍，並打開傘陣遮蓋，一旁有約五名軍裝警員。保安其後將男子推往維園出口，警員一直從旁護送。該男子一度稱：「我要報警！你哋咩人嚟㗎啫究竟？」、「我唔知咩人嚟㗎依啲」、「你可唔可以俾我出嚟先」。被問到被帶走嘅原因，佢就高呼：「佢哋話我有本習近平治國理念嘅書，佢哋話我違規！」佢指自己除此之外冇帶其他物品。

多名警員其後到場圍起橙帶，沿路保護保安將該男子推往出口，期間男子掙扎並與保安推撞，一度坐喺地上，眾保安遂將佢抬起，沿途以傘陣遮蓋，最終抵達近高士威道嘅警察帳篷。男子被截查約10分鐘後，被帶上警車離開。

對於香港警察嘅種種行徑，唔少大陸網民都覺得太over。有廣東網民話：「台灣看好了，這就是回歸的好處」、「把香港的故事告訴灣灣」、「按這個標準，一場中超聯賽拉得三五百人」、「這樣也有罪？」、「犀利！大陸都未有咁緊要」，而香港網民就話：「仲癲過大陸」、「餅強又刷業績」、「大陸人都怕撚咗」、「所以香港唔係中國化，而係新疆化西藏化」，亦有香港網民認為：「D廣州佬都幾搶口 唔怪得要打壓廣東話」。《I》