「高才通」計畫實施至今，加埋隨行受養人，已有約15萬人獲批，當中近九成半來自中國內地。政務司司長陳國基直言，港府目標就係要更多大陸人來港。

「高端人才通行證計劃」（高才通）自2022年12月底推出以來，去到今年6月底，計劃已收到超過8.9萬宗申請，當中有超過7萬宗已經批核，而有大約5.6萬申請者已經來到香港，隨行嘅受養人亦超過6萬人。申請者之中，有九成半係來自中國內地，被質疑唔夠國際化。

「高才通」計劃目標係吸引高收入、高學歷同埋有豐富工作經驗嘅優質人才來香港發展。符合資格嘅申請者唔需要事先有香港僱主聘用，可以直接申請一張為期兩年嘅簽證來香港搵機會。不過，喺簽證有效期滿之前，申請者必須要已經搵到工作，或者係香港開辦咗生意，先可以申請延長逗留期限。

根據入境處數據，截至今年7月底，「高才通」計劃總共收到93842宗申請，當中有74587宗獲批，4531宗被拒。自從計劃推出以來，申請數字一直高企，最新數據顯示，今年6月單月已經有3927宗申請，而其餘月份嘅申請量平均都有4200宗以上。

喺過去一年獲批嘅高才當中，A類即高收入人才（全年收入達到250萬港元或以上）有12880人；B類即係擁有認可大學嘅學士學位，並且喺申請前五年內累積至少三年工作經驗嘅人有22980人；C類即係有類似學歷資格但工作經驗少於三年嘅人則有8544人。

不過，按申請人嘅地區分佈，內地申請者佔咗94.6%，而來自其他國家例如加拿大、美國、澳洲、新加坡等嘅申請者只得3987人，引起社會對計劃唔夠國際化嘅關注。

三中全會《決定》聲稱要「支持香港打造國際高端人才集聚高地」。政務司司長陳國基早前表示，特區政府正研究「高才通」計劃改良方向，例如一啲大學某個科目較出名，但未必屬於百強大學，有啲內地大學很好，但未必進入百強大學，「政府希望多些內地年輕人來港，正朝着這個方向去做。」

勞工及福利局局長孫玉菡近日亦表示，政府會繼續努力，充分發揮香港嘅制度優勢，為國家引入所需嘅尖端同領軍人才。據了解，政府未來會繼續投入資金，推動產業發展，並且吸引私人資金參與投資。佢認為只要有產業，人才來香港先有「用武之地」，自然就會吸引更多高端人才來香港發展。《I》