《彭博社》喺昨日（2日）引述消息人士指，如果日本進一步限制向中國企業銷售晶片製造設備同提供相關服務，中國將會對日本採取嚴厲嘅經濟報復。

報道指，豐田汽車已經私下向日本官員透露，北京方面可能會通過削減日本獲取汽車生產所需礦物嘅渠道，作為應對日本對晶片製造設備實施限制嘅反擊手段。豐田方面暫時未有即時回應路透社嘅置評請求。

報道仲話，多位中國官員最近喺會議中，多次向日本官員重申北京嘅立場，表示中國對呢啲限制措施感到強烈不滿。

中國外交部方面強調，中方一直堅決反對「人為破壞」全球生產同供應鏈穩定嘅行為，反對任何國家將正常貿易政治化，拉攏其他國家加入針對中國嘅技術封鎖。

中國外交部發言人毛寧喺例行記者會上聲稱：中國始終致力於維護全球生產供應鏈的安全與穩定，始終堅持公平、合理、非歧視的出口管制措施。」

日本喺今年7月已經對中國實施咗23種高性能半導體製造設備嘅出口管制，呢啲措施令日本喺技術貿易管制上同美國保持一致，並共同遏制中國製造先進晶片嘅能力。隨住中日之間嘅晶片角力持續升溫，雙方嘅貿易摩擦有可能會進一步升級。

唔單止日本，《法廣》28號引述《彭博社》報道指出，荷蘭計畫限制半導體設備製造商「阿斯麥」（ASML），對其在中國區嘅「維修、維護」半導體設備能力做限制。

據熟悉內情嘅人士透露，部分在中國區嘅設備維修、維護許可證，在今年年底將會到期，荷蘭首相肖夫（Dick Schoof）領導嘅政府，可能唔會批准阿斯麥在到期再次續期。知情匿名人士表示，相關規定預計將涉及阿斯麥頂級深紫外光刻機（Deep Ultraviolet Lithography,DUV)。

阿斯麥嘅晶片製造設備，係業內最先進嘅生產設備，在出售時都會附帶維護協議，有關之定期維護，對設備正常運行至關重要。取消有關之維護服務，可能會導致部分設備最快在出年就會無法運行。

荷蘭政府今次決定，選擇在美國施加一定壓力後，先跟著美方腳步作出限制。拜登政府一名高級官員表示，如果有關盟國不同意在對中管制上同華盛頓保持一致，美國政府提出「對夥伴國實施特定單邊措施」嘅可能性，將會包括採取「外國直接產品規則」（FDPR）。

FDPR允許美國政府控制美國原產技術製造嘅外國產品流動，即使係特定、少量份額都不例外。除咗美國之外，最重要嘅晶片製造設備生產國分別為荷蘭、日本、韓國。彭博此前曾報道稱，拜登政府威脅使用FDPR要盟國全部跟進美國政策。《I》