台灣立法院最大嘅政黨「中國國民黨」副主席連勝文，喺今日（10日）到香港出席「2024港粵澳台青年企業家峰會」。佢喺致詞時，就好似同李家超鬥擦鞋咁樣，大力稱讚港府同大灣區，並趁機批評台灣執政嘅民進黨。佢甚至話，習近平親自部署嘅粵港澳大灣區，係真正落實中華民國國父孫中山理念嘅地方。

開幕嗰陣，香港特首李家超喺致詞中提到，海峽兩岸同香港、澳門都係血脈相連，作為當代中華兒女嘅青年企業家，都應該承擔「天下為公」嘅責任。

李家超話，三中全會強調要發揮「一國兩制」嘅制度優勢，深化粵港澳大灣區嘅合作，仲要完善兩岸經濟文化交流同合作嘅制度同政策。佢亦相信，隨住大灣區聯動實現高質量發展，海峽兩岸嘅企業家會捉住呢個機遇，為區域協調發展開創新局面。

李家超仲講到，青年人係創新嘅主力，係推動社會發展嘅重要力量，只要堅持夢想，就可以盡展所長。面對世上百年未有嘅大變局，企業家應該共同面對困難，未來機遇多多，必定大有作為。

連勝文喺致詞中都唔吝嗇對北京同港府嘅讚美之詞。佢話香港係中國大灣區嘅核心城市之一，與其他大灣區城市相互協作，又話香港嘅前景充滿信心，認為無論經歷咩波折，香港都能夠克服挑戰。

佢仲稱，香港唔單止係中國重要嘅對外門戶，仲係亞洲嘅世界城市，係東西方文化交融嘅地方，並且一直扮演住兩岸三地重要嘅金融同貿易中心角色。佢強調，香港喺大灣區嘅位置至關重要，與其他城市相得益彰，

連勝文話：「我認為香港就好像是紐約的華爾街、跟洛杉磯比華利山的綜合體，深圳就是中國的矽谷或硅谷。各位想想看，從華爾街到矽谷坐地鐵可以到、開車半個小時就可以到，這種效率和這種便捷性，只有在中國大灣區可以找到。」

會後，連勝文被問到台港兩地官方聯繫中斷，佢表示，其實香港同台灣民間交流仍然好密切，台灣人來香港、香港人去台灣依然好頻繁。不過，佢亦話，無論係半官方定官方層面嘅接觸，喺民進黨執政底下基本上完全停咗，冇乜有效嘅溝通渠道，佢對此感到非常遺憾。

至於被問到部分支持反修例嘅年輕人去咗台灣，連勝文認為民進黨當初為咗選舉，刻意歡迎呢啲年輕人去台灣，佢希望香港年輕人可以睇清楚政客嘅真面目。

連勝文話：「很多香港年輕人到台灣去的時候，發現並沒有民進黨，並沒有像當初所答應那樣提供很多的協助，甚至是不聞不問。我只想利用這樣一個事實來告訴很多香港朋友，民進黨只有在你對他有利用價值的時候才會對你更好，當你沒有利用價值、沒有選舉的時候，他完全不把你當一回事。我想香港年青的朋友也許透過這樣一個過程，可以理解到政客真正的嘴臉就是這樣子。」

佢最後強調，自己堅決反對台獨，並認為制度同理念上嘅分歧可以透過溝通，互相討論同理解。《I》