美國總統特朗普喺14日熱烈歡迎薩爾瓦多總統布克爾（Nayib Bukele）到訪白宮。布克爾當面表示支持特朗普嘅驅逐政策，並配合特朗普一同拒絕將一名被錯誤驅逐到薩爾瓦多監獄嘅移民送回美國。

布克爾自稱係「全世界最型嘅獨裁者」，而家已成為特朗普極具爭議嘅驅逐出境行動關鍵盟友。即使美國最高法院確認，下級法院早就命令特朗普政府要協助安排阿布雷戈·賈西亞（Kilmar Abrego Garcia）由薩爾瓦多監獄返美，但布克爾同白宮高層都話拒絕配合。

阿布雷戈·賈西亞未曾被正式定罪，美國當局卻視佢為MS-13惡名昭彰幫派成員，三月時同幾百名被指有幫派背景嘅人一齊被驅逐返薩爾瓦多，送入該國監控最嚴嘅「反恐怖主義監禁中心」。呢座監獄近年成為國際人權組織批評焦點，被形容為「人間煉獄」。

獄中冇枕頭、冇床墊，監房長開燈，100人擠住一個房間，着住統一白T-shirt，剃光頭、手腳戴鐵鏈。每人只得一個金屬床架同一個開放式廁所，伙食極為簡單——冇肉，每餐就係豆、芝士同飯，囚犯要用手食，因為監獄唔允許刀叉。所有囚犯每日得半個鐘可以出嚟郁下筋骨或讀聖經。監獄明言「安全同控制先係最重要」，任何違規都會即時被嚴懲。

事實上，早喺遣返前，美國法院已基於對賈西亞返國後安全風險嘅憂慮，下令暫緩遣返。但特朗普政府無視法院命令，強行將佢送走，事後先話係「行政疏忽」。而特朗普同布克爾仍堅持佢係幫派分子，應該繼續關押。特朗普喺白宮高調呼籲布克爾「再起幾間監獄」，更表示唔排除將犯下暴力罪行嘅美國公民都遣送去薩爾瓦多。

白宮形容，呢個政策係為咗「剷除幫派毒瘤，保障美國人安全」，但實際執行方式卻引來多方炮轟，因為大量人根本冇犯罪紀錄，甚至與幫派冇任何實質關係，就被一刀切列入遣返名單。特朗普政府呢套「快刀斬亂麻」式驅逐方式，惹嚟民主黨多位參議員批評係「無視基本人權」，連一向偏右嘅Podcast主持人喬羅根（Joe Rogan）都出聲話過火。佢直言：「咁樣對人，係咪仲叫民主社會？」共和黨內部亦出現雜音，有議員擔心政策唔止損害國際聲譽，仲會令真正有需要庇護人士冇機會申訴。

「反恐監禁中心」自2023年起正式投入運作，設施保安極嚴，獄警同軍人全部蒙面，以防黑幫報復。每個囚犯幾乎與世隔絕，冇電話、冇探訪，完全失去基本人身自由。國際特赦組織屢次譴責，指監獄環境違反人權。即使如此，特朗普仍大讚薩爾瓦多模式係全球典範，認為美國應該借鏡，「你要解決幫派問題，就要夠狠。」《I》