美國總統特朗普再度成為風眼人物。日前佢喺毫無預警下，宣布即時將中國商品嘅進口關稅由原本嘅104%加碼至125%，同時亦宣佈暫緩對超過75個國家同地區實施新一輪關稅90日。消息一出，全球股市即時反彈，美股三大指數飆升，亞歐市場亦接力升浪。不過，坊間隨即爆出一段影片，顯示特朗普喺白宮辦公室會見華爾街金融鉅子，更大晒口講有人一日賺25億美元，引起網民強烈反感，質疑佢操控市場、圖利朋黨，風波迅即發酵成內線交易疑雲。

事發於美國時間4月9日早市開盤唔耐，特朗普忽然喺自家社交平台Truth Social高調發文：「而家係絕佳買入時機！！！DJT」。所謂「DJT」，除咗係佢自己名字Donald J. Trump嘅縮寫外，更係佢旗下一間媒體公司「特朗普媒體與科技集團」嘅股票代號。結果唔使幾個鐘，公司股價即彈22%。

之後不足四個鐘頭，特朗普再放出大招，話除咗中國之外，將暫緩對全球大部分地區加徵關稅90日，令市場投資者震驚。標指當日收市升超過9%，納指更加爆升12.16%，創下自2001年科網泡沫以來最大單日升幅。日經225指數第二日跟隨升9%，英國富時100亦早段升逾4%。

風波進一步發酵係因為白宮顧問馬丁（Margo Martin）喺社交平台X發佈嘅一段短片，片中所見，特朗普喺橢圓形辦公室招待嘉信理財集團創辦人施瓦布（Charles Schwab），仲當眾誇佢「今日賺咗25億美元」，引發外界一片嘩然。

特朗普這個突如其來嘅政策大轉彎，引起國會多位民主黨議員強烈質疑，懷疑有人預先獲得消息、炒股圖利。加州參議員謝安達（Adam Schiff）即時公開要求調查：「呢啲政策突變提供咗巨大內線交易空間。邊個官員提前知道？有冇人趁機買入賺錢？」

紐約州眾議員歐加修-寇蒂茲（Alexandria Ocasio-Cortez,AOC）亦強硬發聲，要求所有國會議員交出24小時內嘅股票交易記錄：「國會內線交易早就應該禁！」亞利桑那州參議員加勒戈（Rubén Gallego）同謝安達聯署去信美國政府道德辦公室，要求審查有份參與決策官員嘅買賣紀錄。信中仲特別指出，消息公布後，Tesla股價急升18%，而馬斯克曾多次公開批評特朗普貿易政策。

維吉尼亞州參議員凱恩（Tim Kaine）話，連佢理髮師都問佢：「特朗普係咪喺操控股市圖利？」明尼蘇達州參議員史密斯（Tina Smith）則被問到應唔應該查特朗普時直言：「問題切中要害，佢真係獲益良多。」內華達州眾議員霍斯福德（Steven Horsford）喺國會關稅聽證會上更怒斥整件事係「業餘操作」，指控政府蓄意操控市場，佢話：「呢啲唔係玩遊戲，係攸關普羅大眾生計！」

風波中仲揭發特朗普盟友、喬治亞州共和黨眾議員葛林（Marjorie Taylor Greene），早喺4月3日至4日，即市場因關稅消息急跌期間，大手買入亞馬遜同蘋果股票。點知到4月9日特朗普一改口風，兩隻股票即齊齊升，亞馬遜升12%、蘋果升15%，啱啱好俾佢食正。《I》