美國總統特朗普喺美國時間星期四（3月20日）搞咗場極具戲劇性嘅記者會，喺一班中小學生包圍之下，親自簽署一份行政命令，正式展開廢除聯邦教育部嘅行動。今次場面唔單止有書有枱有學生，成件事被營造為一場精心設計嘅政治騷。

白宮當日將東翼改裝成「臨時課室」，特朗普就坐喺一張細細張嘅木書桌前，兩旁有一大班扮晒學生嘅小朋友，齊齊坐喺課室用嘅書枱椅。每個學生枱上都擺咗份似模似樣嘅「行政命令」，配合特朗普簽署嗰一刻，佢哋一齊高舉文件，場面猶如舞台劇咁誇張。

特朗普喺現場講得好直接：「今次只係第一步，我哋會將教育權力，好簡單噉交返畀州政府。」根據佢簽署嗰份行政命令，教育部長將會被要求喺法律容許範圍內，採取一切可能措施，推動關閉教育部，並將教育政策還權畀各州同地方社區。

雖然要真正廢除教育部，就一定要經過國會通過法案，而家雖然共和黨控制緊參眾兩院，但參議院要過60票門檻先得，難度唔小。不過特朗普用行政命令將教育部大部分職能凍結，再大幅裁員，等如「廢武功」咁令教育部實際上冇乜功能。自特朗普上任以來，教育部4100名人員經裁員、解雇同合約買斷等方式已被削減近半，政府並關閉7個教育部轄下嘅地區民權辦公室，裁撤131個部內小組。

民主黨參議員莫瑞（Patty Murray）就直言：「特朗普知道自己冇辦法喺無國會同意下直接廢除教育部，但佢都好清楚，只要炒晒啲人、削晒部門職能，實際上就等如將個部門摧毀。」

事實上，美國教育制度本身就係由州政府主導，教學課綱、教育內容等主要政策都由各州自己話事。聯邦教育部主要角色係確保學校跟足民權法，管理學生貸款，以及提供支援低收入家庭同殘疾學生。

一直以來共和黨控制嘅保守州，對聯邦教育資助嘅依賴反而比民主黨州高。民主黨執政時期，教育部推動多元性別、LGBTQ+相關教育，令保守派團體非常反感，成為佢哋攻擊焦點。

華盛頓郵報指自成立以來，共和黨人就一直主張廢除教育部。共和黨內如萬斯（J.D. Vance）、盧比奧（Marco Rubio）等人亦喺過去一再強調要改革甚至解散教育部。而來自德州嘅眾議員施紀賢（Chip Roy）更加早喺年初就提出法案，要求直接廢除教育部。

但根據路透社上個月嘅民調，大約有65%美國民眾反對廢除教育部，淨係得三成左右支持。經濟學人/輿觀（Economist/YouGov）一份民調顯示，2/3受訪美國民眾表示教育部應擴大或保持現狀。3月初奎尼匹克大學（Quinnipiac University）一份民調亦有60%美國人反對廢除教育部，支持比例僅33%，雖然2/3受訪共和黨人支持，但民主黨人支持比例僅1%，而獨立選民反對比例都超過2比1。《I》