2019年反修例運動期間，灣仔爆發警民衝突，當時喺現場嘅「陣地社工」陳虹秀高呼「保持克制」同「唔好開槍」，但就被控參與暴動。案件拖足五年，陳虹秀最初喺2020年被裁定表證不成立、當庭釋放，但律政司其後上訴得直，令案件發還重審。佢唔認罪，案件今個星期二（11日）裁決，暫委法官鍾明新判佢罪成，即時還柙，並定於下月3日求情，4月9日同另外三名被告一同判刑。

重審期間，控方指陳虹秀現場叫喊，表面上係勸警方冷靜，實際上就係「為示威者撐腰、打氣」，間接助長衝突。辯方則反駁，指陳只係勸警察保持克制，冇任何鼓勵暴動嘅言論，並質疑：「一個社工勸警方克制，點解會犯法？」不過，法官最終裁定佢罪成。

判詞中，法官鍾明新認為，陳虹秀當日身處示威者「中心集結地帶」，當「睇見同清楚知道現場已經演變成危險嘅暴動集結」仍然選擇唔離開，繼續留喺現場叫喊，令警方行動受阻。法官更指，佢當時所講嘅話「直指或暗示」警方行動過快，或過分使用武力，可能令現場人士對警方產生更大敵意，變相加劇局勢。

判詞進一步指出，陳虹秀作為「守護公義」嘅社工，喺示威現場「為示威者撐腰」，「用叫喊失實指控嘅方式為參與集結人士發聲」，目的係拖延警方推進，增強示威者對抗警方嘅信心。基於「環境證供嘅疊加效應」，法庭裁定佢有意圖參與暴動，並鼓勵其他示威者破壞社會安寧。

判決前，陳虹秀喺庭外微笑表示：「無論結果係點都好，我都無悔嘅，希望可以快啲同大家又見啦！唔得都係幾年嘅事啫。」佢表示，自己「平常心」，因為「作為社工，都係做返社工應該做嘅嘢」。陳又提醒大家保持身心靈健康，無論點都要好好生活：「唔想大家太擔心，大家好好照顧自己。」

案件至今已經超過五年，陳虹秀直言自己「有少少麻木」，連緊張感都冇，佢表示：「太多案件已經令我有心理準備，希望有奇蹟。」佢認為，作為社工，本來就應該及早介入、處理社會問題，而檢控佢嘅決定，只係代表政府立場，唔代表佢做錯嘢。

大批社工界朋友當日到庭聲援，有人形容佢係「盡責」、「好熱血」嘅社工，直到幾日前先正式辭職，亦有人相信佢即使身陷囚牢，仍會繼續幫人：「佢喺入面會做另一份工、會有另一個新嘅 service。」

陳虹秀嘅社工牌照將於2月到期，社工註冊局主席許宗盛表示，由於佢被裁定犯上嚴重罪行，相信佢要繼續留喺註冊名單上會有困難。

對於判決結果，國際特赦組織發聲明批評律政司嘅檢控決定同法院定罪不合理，並指出根據國際人權標準，政府有義務促進對集會嘅監察，而每個人都應該有權自由觀察同監督集會，並唔應該因此受干擾或被檢控。《I》