財政司司長陳茂波今日（26日）早上喺立法會宣讀任內第三份《財政預算案》，當中涉及多項與市民息息相關嘅收費調整，包括違泊罰款（俗稱「牛肉乾」）加價、政府隧道同主幹道收費檢討、電動車牌費、停車收費錶嘅收費調整，仲有飛機乘客離境稅加碼，務求增加政府收入。

違規罰款上調 交通收費起價

據悉，違例泊車最基本定額罰款將由現時嘅320元，加至約400至480元。至於超速駕駛罰款方面，超速愈多，罰款愈高。消息指，政府正考慮進一步上調各級罰款，料至少加幅數成。另外，對於雙黃線違泊、違規上落客等其他交通違例行為，罰款亦有機會同步上調，以加強道路管理，減少違規泊車影響交通暢順。

現時超速15公里或以下罰款320元，15至30公里罰款450元，30至45公里罰款600元，而超過45公里則罰款1,000元，同時需被取消駕駛資格至少6個月，並強制完成駕駛改進課程。

為增加收入，政府決定上調飛機乘客離境稅。由2025/26年度第三季起，現時每位乘客需付嘅120蚊離境稅將調升至200蚊，預計每年可為政府帶嚟約16億元額外收入。政府估計，呢項措施對旅客影響輕微，但對經常出行嘅商務人士同旅遊業界或會帶嚟一定負擔。

陳茂波指出，部分政府隧道收費已經超過30年未有調整，政府認為現時係時候檢討相關收費，並貫徹「用者自付」原則。除咗隧道收費，政府亦會同步檢討電動私家車牌照費、停車收費錶嘅收費，仲有各項交通違例罰款，希望透過調整費用，進一步改善交通管理。初步估計，呢啲措施每年可為政府帶嚟約20億元額外收入。

政府又計劃向經陸路邊境管制站離境嘅私家車徵收邊境建設費，旅遊巴士同貨車將獲豁免。根據初步方案，每架私家車離境將需繳付200元，預計可為政府每年帶嚟約10億元收入。至於詳細收費機制及執行細節，當局將進一步公佈。

跨國企業需繳全球最低稅 政府擴大發債規模

財政預算案亦提及政府將落實全球最低稅政策。當局今年1月已經向立法會提交條例草案，配合經濟合作同發展組織（OECD）應對跨國企業逃稅而推出嘅全球最低稅方案，針對年度總收入7.5億歐羅或以上嘅大型跨國企業集團，政府將實施15%全球最低稅，同時徵收香港最低補足稅。根據政府估算，呢項措施一旦於2027/28年度起正式實施，每年將為香港帶嚟約150億元稅收，進一步強化財政資源。

陳茂波表示，香港有條件，同有能力適度增加發債，靈活運用市場力量。隨住基建開支不斷增加，政府計劃擴大發債規模，預計喺2025/26至2029/30年度呢5年間，每年通過「政府可持續債券計劃」同「基礎建設債券計劃」發行債券合共約1,500億至1,950億元，其中約56%將用於為到期嘅短期債務再融資。陳茂波強調，政府發債所得資金只會用喺基建投資，唔會用嚟支付政府經常開支。《I》