美國總統特朗普計劃推出所謂「金卡」（Golden Card），以500萬美元（約港幣3,900萬元）開放外國富豪買路入籍，直接取代現行EB-5投資移民簽證計劃。

特朗普擬推500萬「金卡」取代EB-5

據《路透社》同《法新社》報導，特朗普日前喺白宮橢圓形辦公室會見傳媒時，親自宣布呢項計劃，強調新「金卡」將全面取代EB-5投資移民簽證，令富人可以用真金白銀換取美國公民身份。

特朗普表示，「我哋會推出『金卡』，定價大約500萬美元」，又話呢張金卡唔單止提供綠卡待遇，更會成為正式入籍美國嘅途徑。佢補充話，具體細節將於兩星期內公佈。

現行EB-5計劃由美國國會於1990年設立，目的係透過吸引外國資本投資同創造就業機會，嚟刺激美國經濟。根據美國國籍同移民局（USCIS）網站資料，EB-5申請人需投資至少80萬美元（約港幣624萬元）至105萬美元（約港幣819萬元），視乎投資地點而定，並需要創造至少10個全職就業機會，先至可以獲取綠卡。

不過特朗普稱，EB-5簽證計劃已經「過時」，甚至直斥該計劃「充斥廢話、欺詐」，更批評其為「低價換綠卡」嘅捷徑。

美國商務部長盧特尼克亦撐特朗普做法，指EB-5計劃長期存在問題，「總統決定終結EB-5，因為呢個計劃根本係荒謬！與其繼續推行呢種錯誤政策，我哋決定用『特朗普金卡』取代。」

EB-5計劃要求投資者投入資金到美國企業，並確保創造就業機會，而新「金卡」則無需任何投資或商業活動，只要富豪願意「掟錢」，就能夠獲得綠卡同成為美國公民。根據目前流出嘅資訊，購買「金卡」之後，申請人可以即時獲取美國綠卡，並可喺一定年期之後申請入籍，相比傳統投資移民程序，流程更快、更直接。

俄富豪可買金卡？ 特朗普：「可能啦！」

面對傳媒質疑，新計劃係咪仲會變相等俄羅斯寡頭權貴洗白資金、輕鬆入籍美國，特朗普被問及俄羅斯富豪係咪仲符合資格時，輕描淡寫咁回應：「可能啦！」更進一步補充：「我知道有啲俄羅斯寡頭人品都幾好㗎。」外界擔心呢個計劃或者會成為全球富豪洗黑錢或尋找「第二國籍」嘅渠道，甚至有機會影響美國國家安全。

「金卡」計劃曝光之後，美國國內反應兩極，共和黨內部有人力撐，認為呢項措施可以吸引更多富人帶資入美，為美國經濟注入活力。但民主黨議員則炮轟計劃荒謬，認為特朗普係將美國國籍「標價出售」，等全球富豪用金錢買通入籍，違反公平原則，並可能帶嚟一系列道德同法律爭議。

有移民顧問指，香港一直係美國投資移民嘅重要來源地之一，舊年亦有唔少港人透過EB-5計劃移居美國。若「金卡」正式推出，估計會吸引更多香港富裕階層考慮透過新途徑入籍美國。但要留意美國政府會唔會針對特定國家或地區買家設限，例如要求額外審查資金來源。《I》