烏軍跨境反擊持續進行，烏克蘭總統澤連斯基表示將無限期控制攻下嘅俄羅斯領土，直到將俄方逼上談判桌。俄軍近日頻頻空襲烏克蘭城市進行報復，昨（3日），烏克蘭中部城市波爾塔瓦遭俄軍空襲，造成逾50人死亡、超過270人受傷。

呢次空襲擊中波爾塔瓦嘅軍事學校，爆炸後校舍牆壁炸出大窿，部分結構倒塌。烏克蘭指控俄軍發射咗兩枚彈道導彈，攻擊軍事通訊學院同附近嘅醫院，導致大量人員被困瓦礫堆下，數百人傷亡，死者中包括多名軍事人員。呢場襲擊係戰爭爆發以嚟最嚴重嘅傷亡事件之一，附近幾座住宅大廈同樣受損，玻璃窗碎裂四散。

有俄羅斯媒體報道指，襲擊發生時，學校正進行軍事儀式，烏克蘭國防部即時否認，強調大部分學生當時喺上課，空襲警報響起後幾分鐘內就發生爆炸，學生無法及時逃入防空洞。有目擊者稱，兩枚導彈之間只相隔三秒，令軍方現正調查是否有足夠嘅措施保障軍人安全。

澤連斯基強烈譴責俄羅斯，指俄方必須負責。又指用遠程武器打擊俄羅斯境內目標係刻不容緩，呼籲西方盟友放寬對武器使用嘅限制。

美國白宮國家安全委員會發言人柯比（John Kirby）表示，呢次襲擊再一次證明俄羅斯總統普京嘅殘暴，並透露美國未來幾周將會提供更多軍事援助俾烏克蘭，包括海馬斯火箭炮彈藥、反無人機裝備等。

澤連斯基接受美國全國廣播公司新聞網（NBC News）專訪時提到：「我哋唔需要佢哋嘅土地，我哋唔想將烏克蘭嘅生活方式帶去嗰度，但我哋一定會守住自己嘅土地，呢個係結束戰爭嘅一部分計劃。」佢話，烏克蘭嘅戰略係守住領土，同時會向美國同其他國際夥伴提出相關建議。

佢解釋，8月6日嘅行動係一次「先發制人嘅打擊」，目標係阻止俄羅斯喺烏克蘭邊境建立緩衝區。隨住基輔加大對俄羅斯邊境地區嘅攻擊力度，普京誓言佔領烏克蘭邊境地區以阻止襲擊。

澤連斯基對於是否計劃進一步奪取俄羅斯領土，佢並冇透露：「對唔住，我唔會講。」佢又指，連拜登政府都唔知烏克蘭打算攻入俄羅斯境內，因為呢件事喺烏克蘭內部亦係高度保密。澤連斯基續稱：「我最大限度縮小咗知道呢次行動嘅人數，我認為呢係行動成功嘅原因之一。」佢強調，呢次攻擊嘅目的之一係逼莫斯科從烏克蘭前線地區撤軍，尤其係東部地區。

目前烏克蘭嘅抗俄戰爭已經持續咗922日，各界希望和談能夠盡快展開。烏克蘭堅持要喺有足夠力量嘅情況下進行談判，而控制俄羅斯部分領土可能成為談判籌碼。

第二次和平高峰會預計喺11月舉行，澤連斯基強調俄羅斯代表必須出席。佢話：「冇俄羅斯嘅參與，想透過外交手段結束呢場戰爭係非常困難嘅。」但俄羅斯方面，多名官員已經表示，喺烏克蘭入侵庫爾斯克之後，和平談判嘅可能性變得更加渺茫。《I》