依家嘅香港，乜嘢都係政治行先，就連DSE都要讓路。傳出葵涌順德聯誼總會李兆基中學要求考生，先到操場出席早會升國旗活動，否則不得進入禮堂考場。

《自由亞洲電台》報道，周一（15日）全民國家安全教育日，適逢中學文憑試（DSE)數學科考試。社交專頁「教育刺針」收到爆料，有葵涌順德聯誼總會李兆基中學嘅學生，在原校應考DSE數學科，該名考生提早到達試場，卻被要求到有蓋操場出席早會，並參與升國旗同「國旗下的講話」活動，全程需要站立，否則會被訓導老師「捉住訓話」，警告若唔參加便不得進入禮堂考場。

「教育刺針」創辦人楊穎宇認為，校方嘅做法唔合理：「當日考數學科有好多公式要記，大家要爭取時間衝刺記東西，突然要參加呢啲活動，有相當多考生覺得唔妥。」

以前DSE考試會儘量將考生隨機派去唔同學校考試，以防止考試作弊；但自從2021年開始，考評局實行核心科目筆試「原校及地區試場」安排，即係大多數考生會被安排去自己原來嘅學校考試，而今年都繼續延續呢個安排。

楊穎宇批評，呢個係原校考試帶嚟嘅問題，老師會分不清考生同學生嘅身份，自以為有權力要求考生繼續遵守校內規則。佢指出：「在泛政治化底下，考生只係返嚟考試，你都唔肯放過佢，呢個就係問題。根本泛政治化嘅表現就係全部事都形式主義，升國旗又係形式、國旗下講話又係形式、逼DSE考生參加呢啲活動又係形式，總之場面要靚，全部人要一致。」

《自由亞洲電台》向校方查詢，接聽人員表示要先了解事件再作回覆。而教育局冇正面回應校方是否要求考生參加相關升國旗及奏國歌儀式，只係強調冇發出唔准入禮堂考場嘅指示。

翻查資料，順德聯誼總會李兆基中學一向愛國立場鮮明，之前曾經被指向學生派發反佔中簽名表格，引發學生同校友部滿。

其實原校考試唔係第一次出現問題，楊穎宇指出，去年亦收到報料指，有學校特意打電話叫遲到嘅考生返校應試，甚至俾佢哋用計算機，佢認為呢啲做法都會造成唔公平情況。

而今年係DSE首次設內地試場，楊穎宇認為幾年前開始嘅原校應考，本身只係為內地原校試場作準備。楊穎宇話：「當時（考評局）話大陸試場佈置會跟足香港做法，但因為大陸冇條件打散學生（去唔同試場）應試，所以佢就必須先喺香港改革考試制度，引入原校應考，等到時大陸就可以跟足香港做法，完全一致。」《I》