中國經濟持續下行，一向奉行戰狼外交嘅北京當局，都不得不主動向西方修和，而對中央言聽計從嘅港府官員當然都要照做。律政司司長林定國一改以往對西方喊打喊殺嘅態度，突然高呼要理性討論、以理服人，仲話雙方關係要你情我願添。

《基本法》23條立法後，美國國務卿布林肯宣布對多名香港官員實施簽證限制。律政司司長林定國表示，最重要係立場要清晰，同時要理性對待，港府要面對一個現實問題，外界對中國或香港唔友善，或者一啲人講啲假話，當局必須指出，呢啲係錯誤嘅訊息同埋誤導性訊息。

林定國續講，「我哋唔單止唔同意，仲要解釋佢地錯喺邊度，點解呢啲訊息係錯誤同埋誤導？除咗要表達反對立場，更重要係要啟發理性討論，令人明白我哋為何堅持唔同意，講嘅係啲乜嘢？」

林定國指出，「透過解釋亦係一個好機會，解釋唔同意嘅同時，亦係國家安全教育嘅一部分，其實都係大家關心嘅問題，別有用心嘅人會利用呢啲問題扭曲事實，製造恐懼，我哋要善用呢個機會，促進對法例同國家安全嘅正確認識，要有理性討論，以理服人。」

被問到美國擬實施簽證限制，林定國表示，「佢哋冇做乜，反而令人感到奇怪，但睇佢哋嘅措施，都唔係最極端嘅。」不過，任何限制都唔合適，要分清楚，唔係所有國家都係敵人，大家都要合作，取得平衡，鼓勵對方多理解，做朋友，要鞏固友誼，唔好斷絕溝通，尤其係香港要發展經濟，要喺保持良好關係同時保持尊嚴之間取得平衡，絕非易事，「一定要令對方覺得我哋係理性，唔好開晒火。」

佢續稱，即使對方有唔友善嘅態度，唔代表港府要放棄溝通，因為有好多特區層面、國家層面嘅問題都要同對方商討解決，而香港仍有好多經貿辦喺美國，希望可以繼續發揮溝通功用。

林定國又提到，西方國家一般大眾及商人大多理性，但受政府或傳媒影響，缺乏對香港情況嘅真實了解，應主動接觸及解釋，透過溝通排除誤解。

佢又話，現時港府希望集中發展，其中一樣係鞏固香港作為國際化城市嘅獨特優勢，需要外界對香港有正確認識同信心，而維持一個國際化嘅城市唔係一方面嘅事，一定要外界願意合作同交往，以保持或促進文化及商業交流，要你情我願。《I》