台灣東部外海今（3日）7時58分發生規模7.2強震，係台灣自1999年「921大地震」後嘅最大強震，目前已知造成至少4死、98傷，全台災情共933單。香港天文台表示，接獲超過100名市民報告表示感到今次地震，震動維持幾秒。初步分析顯示本港嘅地震烈度為修訂麥加利地震烈度表第III （三）度，即室內有感，類似小型貨車駛過嘅震動。
綜合台灣媒體報道，根據最新統計資料顯示，今次強震已造成全台灣4死98傷，其中花蓮就多達4死44傷，包括一名駕駛砂石車嘅司機喺大清水隧道前遭落石砸中死亡，以及太魯閣國家公園錐麓古道上3名登山客遭落石砸中，已確認死亡。
另外新北市7人受傷、宜蘭縣2人受傷，其他包括基隆市、台北市、桃園市和台中市都有1人受傷。災情案件數部分則累計至933單，又以其他災情嘅624單最多，其次為民生、基礎設施災情有150單，以及建物毀損97單，新北市491單最多，其次為桃園有159單，以及基隆市43單，另花蓮縣則為9單。
台灣中央氣象署表示，今次地震係自1999年9月21日921大地震後，25年來最強烈地震，估計後續3、4天可能會有6.5級以上至7級嘅餘震。氣象署地震測報中心吳健富主任講，今次地震震央好近陸地，係極淺層嘅地震，所以全台都有感。
有網民影到花蓮山區塵土飛揚，蘇花公路崇德段出現山崩。地震導致花蓮市有啲屋企傾斜，其中一間喺花蓮北濱嘅屋企都倒塌咗，一樓嘅早午餐店當時有人，附近嘅人大聲詢問「還有人嗎」；另一座係喺軒轅路同重慶路交界嘅天王星大樓傾斜，有人被困，警方同消防正在救援。花蓮縣政府已經宣布全縣停工停課。
花蓮吉安鄉慈雲山嘅納骨塔骨灰罈掉落，好多骨灰罈都破碎咗，骨灰都撒晒出嚟。而家現場已經拉起黃線，鄉長請民眾唔好上山，一定要留意安全。據了解，館方已經請法師念經做法會，「讓祖先安心」。
台北市區多處建築物嘅石屎都掉落，中正紀念堂都有石塊掉落。而喺台灣北部宜蘭嘅龜山島，龜山嘅頭部疑似因地震斷咗一部分。東北角國家風景區管理處澄清，地震只係導致部分崩落，唔係龜首斷裂。
台灣電力公司話，今朝嘅地震影響台電同埋民營電廠等8部機組，全國曾經有超過30萬戶停電，修復完之後，仍然有8.7萬戶停電。
地震測報中心前主任郭鎧紋表示，921大地震規模達7.3級，釋放能量嘅威力約當於46顆原子彈，當時嘅餘震好多，每分鐘都有，而且震央喺南投，係人口密集嘅西部都會區，所以傷亡好嚴重。
至於今日嘅地震，威力約當於32顆原子彈，能量較小，但都有幾次6.5規模嘅餘震。郭指出，今次震央喺東部外海，雖然損害冇921咁大，但仍然發布大海嘯警報，呼籲離海岸較近嘅人要小心，盡量遠離海岸。《I》
花蓮有建築傾倒、落石砸中卡車（圖片來源/明報、中央社）
花蓮靈骨塔骨灰罈掉落（圖片來源/TVBS）
