立場親中嘅國民黨籍台灣前總統馬英九週一（1日）率團訪問中國大陸，第一站到訪深圳，接連參訪大疆、騰訊、比亞迪等被西方視為敏感嘅科技公司。民進黨批評此舉恐怕會解讀為台灣認可呢啲企業及其背後嘅中國政策，從而影響台灣同西方嘅關係。馬辦回斥此番說法，稱：「勿扯後腿，非常離譜」。而陪同參訪嘅國台辦主任宋濤就話，西方永遠追唔上比亞迪。

馬英九昨日第二日就先去咗電動車龍頭比亞迪參觀，由國台辦主任宋濤陪同，比亞迪副總裁王杰接待。馬英九與王杰、宋濤就電動車嘅對話，尤其吸引媒體關注。當王杰和解說稱，比亞迪已奪下全世界電動車銷量第一時，馬英九問第二是誰？王杰回答話係特斯拉（Tesla）。馬英九之後問，比亞迪能領先全球電動車幾年？王杰稱，3年冇問題，宋濤就話：「要有這個自信心，永遠追不上。」

之後一行人再去孫中山故居悼念，講到「自由團結均富統一中國」嗰陣，馬英九好感慨，甚至有啲哽咽。傍晚，馬英九抵達廣州，同廣東省委書記黃坤明見面，佢提到孫中山嘅故鄉係革命起點，希望兩岸攜手追求和平，避免戰爭，共同振興中華。不過，佢一直都冇提「中華民國」呢四個字。

馬英九向宋濤表示，佢任內達成咗兩岸「九二共識」、反對台獨嘅共同政治基礎，係兩岸攜手前進嘅重要因素，無論外在環境點樣變，佢絕對唔會改變呢個立場。

民進黨立委陳冠廷對於馬英九嘅參訪表達擔憂，指大疆等中國科技公司係被西方國家視為「敏感」，馬英九今次參訪恐導致外界誤解台灣支持呢啲公司及中國政策，從而影響台灣同西方國家嘅關係，「我認為中國其實是在設定一些框架跟議題，讓馬前總統直接走入這個框架，而透過這個框架散發出的訊息給國際社會，都是對我國會有負面的影響。」

民進黨立委吳思瑤亦表示，馬英九參訪被國際列為「黑名單」嘅企業，證實佢係中國統戰最好嘅樣板，「馬英九難道不覺得應當要迴避、慎選嗎？」吳思瑤嘆道，馬英九呢趟十一天嘅行程，到目前為止第一天、第二天，「我們真的要很遺憾地說難以期待、甚至是不可期待。」

馬英九基金會執行長蕭旭岑則反駁呢啲說法，指比亞迪係全球最大嘅電動車銷售商，大疆公司佔全球70%市場份額，台灣學生都好認真咁參觀，令佢地有更國際化嘅視野。佢認為所謂「西方錯誤解讀」係完全唔合理嘅，呢啲封閉、故步自封嘅論述，相信台灣年輕人唔會接受。《I》