英國《鏡報》援引皇室作家報道，威廉王子同凱特王妃希望同弟弟哈里夫婦結束冷戰，甚至主動邀請哈里夫婦同佢哋嘅兩個細路阿奇王子( Prince Archie）同莉莉貝特公主（Princess Lilibet）返英國探親，不過被梅根拒絕咗。

《鏡報》周一（1日）刊出皇室作家湯姆奎因嘅獨家專訪，話威廉王子同凱特王妃正竭盡所能，希望同哈里王子、梅根和好。佢哋已經聯繫過哈里夫婦，主動提議佢哋帶埋細路返英探親。「威廉同凱特建議梅根同哈里帶細路返嚟，希望同弟弟、弟媳和好。不過而家睇嚟，呢個建議冇咩進展。」湯姆奎因話，梅根堅持拒絕咗威廉嘅邀請。

哈里夫婦同威廉凱特嘅關係一直好緊張。去年初，哈里喺佢嘅處女作回憶錄《備用》度詳細寫低佢同威廉王子嘅一次激烈爭吵。據稱，威廉批評梅根係「難相處」同埋好粗魯，仲拉住哈里嘅衣領，撕扯佢嘅項鍊，最後仲將佢打倒喺地上。

阿奇王子同莉莉貝特公主，而家同哈里夫婦喺美國加州居住，同英國皇室嘅聯繫非常少。有報道指，哈里同梅根原本計劃喺2022年9月帶埋兩個細路返英，但最後取消行程，因為佢哋要求皇室喺佢哋返英期間提供人身安全保護，不過遭到拒絕。

早前，凱特王妃突然公開證實自己罹患癌症，令全球為之震驚。據《紐約郵報》報道，連哈里夫婦都係睇新聞先知道呢個消息，事前根本冇收到通知，顯示王室對佢哋已經失去信任，有意保持距離。

凱特公布罹癌消息後不久，哈里王子同梅根發表簡短聲明，對凱特表達支持，祝福佢能順利康復，令家人平安健康。佢哋亦希望凱特同家人可以喺保有隱私同平靜嘅狀況下渡過呢個難關。

《紐約郵報》指出，事實上，哈里同梅根之前完全毫無察覺，直至呢個消息成為全球焦點先得知呢個壞消息。

一位消息人士透露，「哈里同梅根完全冇預先得到消息，顯示佢哋之前嘅行為已經造成無法彌補嘅傷害，王室對佢哋嘅信任已經完全崩潰，而家都決定同佢哋保持距離。」對於呢個消息，哈里同梅根未有發表回應。《I》