俄羅斯入侵烏克蘭以嚟，被西方全面制裁圍堵，甚至連中國都不願光明正大向其輸送武器。普京政權轉而向北韓求援，獲金正恩大力支持。如今俄國「投桃報李」，喺聯合國安理會動用否決權，終結監督國際對北韓制裁嘅專家小組續任。

聯合國專家小組早前指，而家正調查緊莫斯科同平壤之間武器轉移嘅報告。而數週後，俄羅斯今（29日）係聯合國安全理事會度動用否決權，終結咗監督國際對北韓制裁嘅專家小組續任。

俄羅斯呢個舉動，被烏克蘭外交部長庫列巴（Dmytro Kuleba）等人批評。北韓遭控正協助俄羅斯對烏克蘭嘅入侵行動，庫列巴喺社交媒體上表示，俄羅斯今次動用否決權就係「認罪」嘅表現。

美國批評俄羅斯動用否決權，係出於一己之私，目的係掩蓋呢個專家小組有關其同北韓勾結嘅報。美國國務院嘅發言人米勒（Matthew Miller）指出：「俄羅斯今次行動完全不顧慮國際和平同安全，這一切都是為咗推進莫斯科同朝鮮民主主義人民共和國（DPR）達成嘅腐敗交易。」

雖然俄羅斯喺安理會動用否決權之後，未移除對北韓嘅制裁，但此舉意味住監督執行情況同埋發現無數涉嫌違規行為嘅專家小組工作被逼結束，呢個專家小組嘅任期將會喺4月底屆滿。

自2006年嚟，安理會一直喺應對北韓核計劃嘅情況下，加強對北韓嘅制裁。俄羅斯同中國自2019年以嚟，一直都試圖說服安理會鬆綁制裁。呢啲制裁措施冇截止日期。今次中國投下棄權票，冇同俄羅斯一齊動用否決權，而其他安理會成員都投票支持專家小組繼續運作。

雖然安理會喺2016年同2017年對平壤加強咗制裁，但北韓嘅核武器同武器發展依然持續。北韓官方媒體報道，上週平壤當局測試咗一款「新型中程超音速飛彈」嘅固體燃料發動機。最近嘅巡弋飛彈試射令外界估計，北韓可能喺將呢啲武器運送俾俄羅斯之前，進行測試。

專家小組喺3月初發布嘅最新報告中指出，北韓試射彈道飛彈同違反石油進口限制，「持續藐視」制裁，同埋話佢哋而家正調查北韓將武器運送俾俄羅斯用喺烏克蘭戰爭嘅報告。

包括美國、英國同法國等10個安理會成員就發表聲明，捍衛制裁監督者嘅工作。聲明話：「面對不斷出現企圖破壞國際和平同安全嘅行為，呢個專家小組嘅任務比以前更加重要。」《I》