眾所周知，香港近年「由亂到治，由治及興」嘅最大受益者就係本港長年嘅競爭對手新加坡。最新公布嘅《2024年度DHL全球連通性報告》，香港今年排名比起2017年下跌四位，反觀新加坡就穩居世界第一。新加坡前外長楊榮文表示，香港資金、企業及人才外流，新加坡未來5年至10年將會受惠，又疑似「抽水」咁話，「香港雖然不再是過去的那個國際城市，但將會是中國的國際城市」。

DHL同美國紐約大學斯特恩學院（Stern School of Business）共同發布呢份報告，香港喺全球181個經濟體中排第10，比起2017年就跌咗4位。香港嘅連通性深度喺全球181個經濟體中排第四，呢個指數主要睇一個地區對比自己本地嘅經濟活動量，同埋境外流動量之比例。而喺呢方面，香港嘅商品進出口排第一，同埋對外直接投資嘅流量亦係第一。澳門嘅排名都有啲上升。至於香港境外流動量比例最高嘅經濟體，就係中國內地，佔咗61%，其他流動量主要係大型亞洲經濟體，而喺中美關係「去風險」嘅情況下，美國僅佔5%，英國佔2%。

報告提到，中美關係持續降溫，自2016年以嚟，兩國涉及對方嘅流動份額都跌咗大約四分之一。但係，兩國之間嘅聯繫依然好緊密，佢哋嘅流動幾乎超過任何其他國家。俄羅斯同歐洲已經唔再緊連，導致俄羅斯嘅連通性大幅下降，喺全球20大經濟體中，跌咗兩倍多。同時，數據顯示全球經濟並冇被對立嘅地緣政治勢力分割。

新加坡喺全球化程度方面係第一，荷蘭同愛爾蘭就緊隨其後。報告顯示，歐洲係世界上最緊密聯繫嘅地區，然後係北美、中東同北非。報告都顯示，有關全球轉向區域化嘅預測至今都未（至少而家）喺國際流動模式中證實。大多數國際流動都穩定進行，甚至延伸到更遠嘅距離，主要地理區域内嘅流動比例都喺下降。至於貿易方面，只有北美洲嘅貿易模式明顯轉向區域化。

喺2004年至2011年出任外交部長嘅楊榮文，日前接受《明報》訪問時話，新冠疫情同埋《港區國安法》嘅實施，令部分香港資金、企業同人才流出，所以新加坡未來5至10年會受惠。

佢表示，香港經歷2019年嘅唔穩定情況之後，社會對政府嘅信任降低，對一啲防疫措施唔係好合作。佢同啲港人傾過嘅時候發現，有啲港人雖然唔公開表達不滿，但對港府都唔太信任。佢覺得新加坡同香港喺抗疫方面有啲唔同，就係新加坡人對政府嘅信任度高啲，而香港面對國際同內地嘅困境都好大。

不過楊榮文隨即話鋒一轉，話長遠嚟講，香港有中國做後盾，「香港雖然不再是過去的那個國際城市，但將會是中國的國際城市」。《I》