烏克蘭總統澤連斯基罕見透露，自兩年前俄羅斯入侵烏克蘭以嚟，已有31,000名烏軍士兵陣亡。佢表示，去年反攻失敗係因為計畫被外洩畀俄羅斯，強調烏克蘭軍方已有一項明確嘅新反攻計畫，呼籲美國國會必須喺一個月內就600億美元嘅對烏援助做出決定。美媒《政客》（POLITICO)報道，台灣領導人「極度擔心」美國可能放棄烏克蘭，並警告此舉將對北京發出錯誤訊號。

舊年烏克蘭軍隊發動咗反擊，儘管有數十億美元嘅西方援助，但大致上都唔算成功，唔能夠突破好多俄軍防線。烏克蘭總統澤連斯基話，舊年發動嘅反攻行動事前被外洩畀咗俄羅斯，烏克蘭軍已經有一個新嘅明確反擊計劃。

澤連斯基喺基輔嘅記者會度講：「克里姆林宮係反攻行動開始之前已經攞到我哋嘅反擊計劃。」烏克蘭總統府之後向法新社證實，澤連斯基講嘅係莫斯科攞到敏感軍事規劃嘅情報。澤連斯基冇提供更多有關軍事機密洩露嘅詳情，不過佢透露，基輔正準備「幾個」版本嘅戰場策略，以避免再次洩露事件。

隨住戰爭進入第三年，利用基輔嘅彈藥短缺同埋兵力不足，俄羅斯喺戰爭方面有新進展。美國嘅援助對烏克蘭至關重要，但喺共和黨掌握嘅眾議院面臨好大嘅障礙。隨住烏克蘭獲得嘅軍事補給減少，俄軍本月取得咗象徵性嘅勝利，烏軍經過數月嘅戰鬥之後撤出咗東部城鎮阿夫迪夫卡。俄軍正沿嗰1,200公里嘅前線，試探烏克蘭其他地方嘅防禦工事。

澤連斯基喺基輔舉行嘅發布會上對記者講：「當我哋講到美國嘅援助嘅時候，我哋應該明白唔係指資金支援，主要係武器。」澤連斯基話，出年將會決定戰爭點樣結束，同埋指11月嘅美國大選係一個潛在嘅轉折點，「未來幾個月對我哋嚟講會好艱苦，因為美國嘅變化會對一啲國家有影響，不過歐盟表明佢有能力喺援烏方面做領導者。」佢又表示，烏克蘭預計俄軍會喺5月底或夏初準備反攻，烏軍會準備好戰鬥。

另一邊廂，美國眾議院『美國與中國共產黨戰略競爭』特別委員會主席蓋拉格（Mike Gallagher），早前率領美國國會跨黨派重量級訪問團訪問台灣，同台灣總統蔡英文、總統當選人賴清德等台灣高級官員會面。

美媒《政客》（POLITICO)報道，台方多次提到美國支持烏克蘭嘅重要性。蓋拉格表示，「台灣對烏克蘭非常感興趣，並且非常擔心我哋可能會離開烏克蘭」。有份參與嘅委員會高級成員、伊利諾伊州民主黨眾議員克利胥納莫提（Raja Krishnamoorthi ）表示：「佢哋像鷹派一樣關注對烏克蘭嘅補充要求，佢哋認為烏克蘭戰勝俄羅斯嘅罪惡入侵對於向中國共產黨傳遞信息非常重要。」

報道指，特朗普喺美國總統大選中獲勝嘅可能性，以及可能導緻美國對台灣傳統支持變化嘅可能性，令台灣領導人感到擔憂。對此，委員會成員試圖透過向台灣保證兩黨喺國會跨黨派嘅對台支持，緩解台方憂慮。蓋拉格話：「台灣人民應該相信，無論我哋嘅選舉變得多麼激烈，美國都將堅定地同台灣企埋一起。」《I》