香港駐倫敦經貿辦周二（13日）喺倫敦白廳舉行農曆新年酒會，期間被港人示威者成功「踩場」，嘉賓要喺抗議口號嘅聲音中入場。商務及經濟發展局長丘應樺甚至為此事召見英國駐港總領事抗議。有網民諷刺稱：「係咪唔知民主地區，有示威遊行既自由？」

特區政府周四晚上回覆傳媒查詢時稱，強烈譴責示威者宣揚港獨及意圖滋擾他人嘅行為，指經貿辦已經向英國警方投訴。丘應樺周四喺政府總部同英國駐港總領事會面，向對方投訴事件嚴重干擾經貿辦嘅正常運作。港府發言人又話，高度關注同極度不滿，嚴正要求英方履行責任，保障經貿辦嘅合法權益同確保經貿辦嘅日常運作免受滋擾。

多名港人示威者當晚成功突襲「踩場」後，除咗喺酒會門外喊抗議口號，仲將香港區旗放喺入口處地上，嘉賓要踐踏過區旗先可以入場，中國駐英使館代表更一度停留喺場外。

有份示威、目前喺英國申請政治庇護嘅流亡港人鍾翰林稱，當晚倫敦警方派咗5、6名警員到場，但明確向佢哋表示在場出現係為咗保障雙方權利同安全，無干預示威者，只提醒佢哋唔好阻撓嘉賓進場。

鍾翰林強調，佢哋當晚係和平示威，只有叫口號同派傳單，未有阻止任何酒會參加者進出，佢認為港府指控佢哋干擾經貿辦嘅正常運作係荒謬說法。

鍾翰林指出，香港經貿辦嘅工作應該淨係推廣香港同外界嘅經貿同文化交流，但喺過往幾年該辦事處經常為港府作粉飾太平嘅政治宣傳，又發聲明針對海外報章同政客對香港嘅言論，認爲呢啲係超出香港經貿辦應有嘅職權範圍。佢話：「香港政府係喺濫用呢個權力，所以不存在我哋去阻撓到佢哋運作、去干擾佢哋嘅運作。」

有份喺場參與示威、被香港警方懸紅通緝嘅劉祖廸就表示，對港府嘅說法高度關注並感到非常唔滿。佢話：「因為佢哋喺干預英國以至其他唔同西方國家嘅言論自由，呢種言論自由喺英國社會係一種公民權利，並唔由中國共產黨或香港嘅傀儡政權所左右。而且整個過程中冇人受傷，亦冇英國警方拘捕任何人士，呢個反映整個活動係非常符合當地、英國社會嘅法例。」

喺連登討論區上，唔少網民都嘲諷港府嘅做法。有網民話：「咁執咗佢囉」、「以為自己喺香港？示威吓又要拉要鎖？」、「一個小漁村嘅辦事處有乜權益要保障？以為自己仲係廿年前嘅英屬香港？」、「人哋國家俾人行使示威、言論自由關你𠹌事咩」。

亦有唔少網民質疑港府作法僭越中央職權：「次主權城市憑乜干涉外交事務，有咩訴求同主人講咗先」、「香港又唔係國家，憑乜見人地領事？係咪想搞港獨？」、「又話外交係國家事務，幾時輪到市級官猿出聲？」仲有網民好奇英方反應：「想知英領事點答呢條傻鳩」等。《I》