國際邁阿密嚟港踢表演賽，球王美斯全程齋坐，引發「美斯之亂」，事件至今仍持續發酵。香港足球總會會長貝鈞奇爆料稱，美斯同國際邁亞密原定到上海作賽但告吹，有人接觸佢要求承接並索價1,000萬美元出場費。佢話自己斷言拒絕，形容係唔合理天價。時事評論員馮睎乾指，世界上唔少獨裁者開出天價聘請國際頂級球星粉飾自身惡劣人權紀錄，而港府卻想用低價「講好香港故事」，欠缺自知之明。

貝鈞奇接受鳳凰網訪問時話，原本有間上海體育公司安排國際邁亞密舊年11月去內地友賽，但因為未獲批文冇得成行。由於已經安排好行程，圈中經紀人就同佢聯絡，希望港府可以接手，放出消息稱球隊出場費為1,000萬美元，又傳上海方面已付300萬美元。但貝鈞奇就直接拒絕，「因為呢個價格係天價，冇可能有這麼貴。」

貝鈞奇提到香港足總2003年邀請皇家馬德里嚟港比賽嘅例子，話當年只係支付200萬歐元嘅費用，就包括碧咸等球星全部上場，令所有香港市民都好滿意。

佢又話因為上海方面已付訂金，於是改期到今年1月。因為美斯好受歡迎，港府「出於一番好意」，想俾市民喺春節前睇下佢踢波，所以先成就佢今次嚟港，但估唔到美斯唔上場，認為對方態度惡劣。

香港作家兼時事評論員馮睎乾喺社交平台Facebook上，以「美斯為什麼不能跟奴才和公公握手？」撰文分析事件。佢指出，美斯曾擔任旅遊大使為沙地阿拉伯宣傳三年，收費約2500萬美元；又曾收咗240萬歐元到訪中非國家加彭，出席新體育館嘅奠基儀式。

其中，沙地人權紀錄一向劣跡斑斑：對也門發動戰爭，殺害包括兒童在內嘅平民；2018年又傳派出特工暗殺分屍《華盛頓郵報》專欄作家兼異見人士Jamal Khashoggi，亦一直以殘酷壓迫婦女、少數族裔、社運人士同異見者而臭名昭彰。而加彭人權狀況，都同沙地差唔多，鎮壓異見人士係例牌菜，國內仲有人殺害兒童作為獻祭，但政府懶得調查。

馮睎乾分析，由過去紀錄黎睇，美斯並不吝於收取天價替名聲不佳嘅獨裁國家進行「體育洗白」（sportswashing）【註：指政府同國家故意利用體育賽事、品牌來粉飾自身惡劣人權紀錄和名聲】，但今次邁阿密國際全team人嘅「戲金」淨係得5000萬港元，即640萬美金。港府甚至開出一份淨係得百幾萬港元（大約13萬美元）報酬嘅合約，想美斯2月5日喺維多利亞港遊船河一圈「講好香港故事」。

馮睎乾批評「這些港共官員就是白癡」，因為沙地王子花2500萬美元先請得動嘅球王，港官居然妄想用13萬騙人做相同嘅事，「這個寒酸的價錢，對美斯來說是天大侮辱。」而美斯喺香港「西口西面」，主因係呢班「欠缺自知之明、行事又乖離現實的菠蘿雞官員**」，**妄圖用蔗渣嘅價錢食到燒鵝嘅味道。

至於2014年美斯曾到香港參加友誼賽，當年既冇「射波」又冇「黑口黑面」，點解今日變臉？馮睎乾指，「其實美斯沒有變，只是香港變了」，如果佢係去一個國際聲譽好嘅地方，如東京，當地唔需要佢做洗白，自然想踢波就踢波。

但今時不同往日，喺球星心中香港定位已經有別於東京，變成沙地、加彭咁樣，「莫說陪港官遊船河說好香港故事，就連握一下手，合一次照，踢幾腳波，如果美斯不收足錢，都會做爛自己個市，你叫他怎樣向沙地王子交代？」

馮睎乾認為，當美斯入境一些名聲不佳嘅獨裁國家，當地政權又冇畀足錢嘅話，就要步步為營，以免一時不慎「送大禮」畀對方，開罪其他付咗天價嘅客戶。而美斯同碧咸其實都心知肚明，冇論係美斯一人收百萬，抑或全隊人收5000萬，呢個並唔係「體育洗白」（sportswashing）嘅價錢。如果港官想美斯合照、握手、微笑、做宣傳，甚至落場踢波，幫你搞「盛事」，其實係另一個價。

馮睎乾直言，「如果香港還是從前文明世界的香港，美斯自然不必時時刻刻板起臉，以防被人用作宣傳；如果沒有一堆奴才公公刻意埋身抽水，他也不必像遠離麻風病人那樣，避之唯恐不及。」《I》