國際邁阿密嚟港踢表演賽，球王美斯全程齋坐。《星島日報》報道，有啲政界人士扯到香港國際地位、西方勢力影響等政治原因。政府消息人士就話，當局會留意美斯喺日本嘅情況，如果佢喺日本可以上場踢，咁就難免質疑佢點解喺香港就唔得。

政府消息人士透露，能夠咁快就發出新聞稿，係因為喺比賽前後各種商討安排過程，已經令港府好不滿。邁阿密周五嚟港嗰陣，主教練馬天奴曾經表示，會爭取美斯喺港嘅表演賽有「最多上陣時間」。港府亦擔心美斯嘅情況，負責呢個盛事嘅文體旅局官員，一直透過主辦機構Tatler同邁阿密聯絡。

消息人士批評整個安排，主辦機構Tatler同邁阿密都各有問題。Tatler明顯無足夠「牙力」說服邁阿密，而班主碧咸有能力，但無根據政府嘅要求處理。Tatler係今次向盛事基金申請資助嘅主辦方，有官員直言，經過呢一役，Tatler以後要再向盛事基金申請主辦盛事，估計都可以免談。

對於邁阿密同美斯嘅表現，港府中人大表奇怪，認為邁阿密作為一支球隊，即使「大枝嘢」對港府「唔畀面」，亦冇理由「唔畀面」在場近4萬球迷，懷疑當中是否另有乾坤。消息人士指出，邁阿密今次嚟港，本來仲同旅發局簽署另一份價值百萬計嘅合約，要坐船遊維港，旅發局希望藉此向全世界推廣香港，但喺嚟港前數日，邁阿密卻取消呢項活動，相關合約亦取消，呢個舉動令到港府官員有所懷疑。

今次邁阿密嚟港踢表演賽，從頭到尾都係以美斯作招徠，消息人士透露，合約嘅確寫明美斯要落場踢45分鐘，除非受傷。而家邁阿密軍醫指美斯受傷，理論上並唔違約，消息人士承認，政府確實難以質疑軍醫嘅判斷，但係當批出款項時，Tatler亦有責任交代美斯嘅受傷情況，同埋幾時受傷。

今次盛事爛尾，亦有啲政界人士扯到香港國際地位、西方勢力影響等政治原因，認為失場事件「超越商業因素」，但真正原因無人知曉，傾向屬美斯問題居多，又指事件對盛事之都形象有影響，但不宜反應過度激烈。《I》